Iphoyisa eliqapha izikhulu engozini
Kuthiwa belidakwe lixathuka, lingakwazi nokuphuma emotweni
LILALE libaliwe iphoyisa elisebenza ophikweni olugada izicukuthwane nabaholi abaphezulu, okuhlanganisa kubona umengameli wezwe neSilo, uma beseThekwini, emuva kwezinsolo zokuthi libe sengozini yemoto lidakiwe maqede lashaya utshani.
Imithombo yeLANGA iveza ukuthi leli phoyisa lesifazane libe sengozini yemoto ngoLwesihlanu ebusuku, edolobheni eThekwini. Ingozi yenzeke emgwaqweni uField, emuva kwayo kuthiwa umnikazi wemoto eshayisiwe, ulijahile, kwaze kwangenelela amaphoyisa ababone kuhujwana.
Imithombo yaleli phephandaba, ithe ngendlela leli phoyisa ebelidakwe ngayo, kalikwazanga ngisho ukuphuma emotweni ngesikhathi ozakwabo abasebenza ngezinja (K9) Unit, belinxusa ukuba liphume kuyona.
Kuthiwa licele ukuyoshiya imoto lapho elisebenza khona, okuyindawo okubuye kuhlale kuyona nesikhulu esimqoka KwaZulu-Natal, eseMorningside. Kuthiwa sekufikiwe kule ndawo, kusuke esinamathambo umsolwa engasafuni ukuboshwa. Kuthiwa kudingeke ukuba amaphoyisa asebenzise indluzula, ngoba kuthiwa umsolwa ubeselwa futhi ethuka nenhlamba.
Ngokusho kwemithombo, umsolwa oneminyaka engama (28) ubudala, kutholakale ukuthi uphuze ngokweqile njengoba ebenotshwala obubalelwa ku-0.74g egazini lakhe. Ngokomthetho waseNingizimu Afrika, umshayeli ophuzile kuvumeleke ukuba abe nesikali esingu-0.24g ku-1 000ml womoya, kube ngu-0.05g kwi-100ml yegazi.
Kuthiwa kuphinde kwasuka isiphithiphithi ngesikhathi leli phoyisa seliyiswa esibhedlela i-Addington ukuyothathwa igazi.
“Ubengafuni ukuthathwa igazi. Kudingeke ukuba nakhona abanjwe ngenkani ngoba ubelwa ngendlela eyisimanga. Ngesikhathi elwa, ubethuka nenhlamba kozakwabo abebembophile,” kusho umthombo. Ngokusho kwemithombo ezibonele, amaphoyisa ambophile bekungelimhlophe nelaseNdiya, kanti umsolwa kuthiwa ubewachapha ngenhlamba ewacwasa ngokwebala.
Okhulumela amaphoyisa KwaZulu-Natal, uCol Thembeka Mbhele, ukuqinisekisile ukuthi owesifazane osebenzela umbutho wamaphoyisa, uboshwe ngoLwesihlanu ebusuku ngenxa yokuthi akazange ame emuva kokumbandakanyeka engozini yemoto.
“Kutholakale ukuthi ubedle amanzi amponjwana ngokweqile kwazise uhloliwe sekwenzeke le ngozi. Uzovela enkantolo kaMantshi eThekwini namhlanje ngoMsombuluko,” kusho uCol Mbhele.