Bayesaba okubulawe abazali bebuka
Sebesikaza ukushiya ikhaya
USIKAZA ukushiya ikhaya umndeni osuphila ngokuthuka izanya emuva kokudutshulwa kubulawe umama wekhaya nomalume wakhona behlezi egunjini lokudlela ngoLwesihlanu olwedlule ebusuku Ogengele, eMtubatuba.
ILANGA lithole ukuthi kusaduma amakhanda emndenini wakwaMdletshe ngokudutshulwa kukaNkz Sibongile Mdletshe (52) nomfowabo, uMnu Thandubaba Mdletshe (42).
Lesi sigameko kuthiwa senzeke zibuka izingane zakulo muzi okuzishiye zethukile.
UMnu Velemseni Mdletshe (25), oyindodana kaNkz Mdletshe, uthe kungene owesilisa ongaziwa unina, noninalume behlezi egunjini lokudlela, wavulela ngenhlamvu.
Uthe uninalume ushona nje, ubebizwe ngudadewabo ukuba azochela ngenyongo izimpahla zikamfowabo (kaVelemseni) oshone ngoLwezi (November).
“Kuthe esanda kufika umalume, mina nomfowethu nendodana kamfowethu (lo ongasekho) sayokwenza ukudla ekhishini ngezithuba zehora lesi-7 ebusuku. Sizwe ngesibhamu siqhuma egunjini abebehleli kulo, kuthe uma ngilunguza, ngabona owesilisa emile emnyango eqhulula inhlamvu ebhekise kubona.
“Ngiphume ngefasitela lasekhishini, ngabaleka ngishiya abafowethu abancane endlini. Kuthe uma sengisemgwaqweni ngahlaba umkhosi, kwafika omakhelwane sebevele sebeshonile umama nomalume,” kusho uMnu Mdletshe.
Uthe akazi ukuthi umbulali ubedinwe yini njengoba unina ebengumuntu ozihlalela kwakhe, engakukhonzile ukuhamba imizi yabantu, kanti uninalume ubehlala emsebenzini.
“Sisangene amakhanda, asazi ukuthi ngubani owenze lokhu njengoba singakaze sizwe nokuthi kukhona abaxabene nabo. Mina angikakholwa ukuthi akasekho ngempela umama.
“Mhlawumbe ngizoqala ukukholwa sekuhambe abantu emuva komngcwabo. Lo muzi cishe sizowuvala ngoba kangiboni ukuthi sisazokwazi ukuhlala kuwona ngemuva kwalesi sigame ko,” kusho uMnu Mdletshe.
Okhulumela amaphoyisa KwaZuluNatal, uColonel Thembeka Mbhele, usiqinisekisile lesi sigameko sokudutshulwa kwamalungu amabili omndeni owodwa.
Uthe imbangela yokubulawa kwabo kayikaziwa, amaphoyisa asaphenya.