Ibalisa ngesithunzi inkosi eshaywe inqunu
Lthi ingenelwe ngesibhaxu kubuka undlunkulu nabantwana
IBALISA ngokwehliswa isithunzi ngendlela exakile phambi kukandlunkulu nabantwana bayo Inkosi uSimphiwe Thandanani Zulu yaseNtembeni, eMelmoth, engenelwe ilele entathakusa yangoLwesine ngamadoda angaziwa azibize ngamaphoyisa afike ayithela induku.
Ithe ishaywe ingembethe, kubuka umndeni wayo, la madoda efuna isibhamu. Nakuba kungavumi ukuba ikhulume ngalolu daba iNkosi uZulu kodwa ikhala kakhulu ngesithunzi sayo esehliswe italajwa ingembethe.
“Angikaze ngehlelwe yisithunzi kanje empilweni yami. Ngishaywe ngezimpama phambi kwezingane nomkami bebuka ekubeni ngiphethe isizwe. Uma kuwukuthi kukhona abebekufuna, kungani ngingabizelwanga esiteshini?
“Bengizoya khona bese bengibuza kahle konke abakufunayo. Ibuhlungu into abayenze kimina nomndeni wami kanye nesizwe nje sonke,” kusho iNkosi uZulu.
Kuthiwa kusize ukufika kukamkhwekazi wayo inkosi, ozala uNdlunkulu Phindile Zulu, ehamba namaphoyisa asendaweni.
Ngokuthola kweLANGA, amaphoyisa ashaye inkosi abengasuki esiteshini saseMelmoth.
Kuthiwa kakucaci ukuthi abevela kuphi njengoba kuthiwa abemaningi, ehamba ngezimoto ezibhaliwe okuthiwa abezishiye buqamama nesigodlo.
Kuthiwa la maphoyisa aphinde asola inkosi nondlunkulu ngokweba imoto yohlobo lweGolf ebipa- kwe egalaji lakhona.
ILANGA lihambele iNkosi uZulu ngenhloso yokuthola ngokwenzekile, liyifice iphuma kwadokotela njengoba ibixhuga. Ibibonakala ukuthi itubekile emzimbeni njengoba ibihamba idondolozela.
Elandisa ILANGA ngokwenzekile uNdlunkulu uZulu, uthi bese ligamenxe ihora lokuqala ekuseni ngesikhathi bezwa kungqongqoza umuntu emnyango. Uthi ubuzile ukuthi ngubani, waphendula ngokuthi makavule ngamaphoyisa. Ngaleso sikhathi uthi bekuzwakala ukuthi baningi abantu abami ngaphandle njengoba bebehhomuzela.
“Ngithathe ucingo ngashayela umama ukuba aphuthume azolanda izingane ngoba bengingazi noma ngamaphoyisa ngempela yini. Ngiqeda nje ukukhuluma naye, avele akhahlela isicabha angena ngaphakathi aqonda ku- Mntwana (Inkosi) ambuza ukuthi sikuphi isibhamu sikamfowabo obeyisosha. Usilandulile, elinye lawo lamshaya ngempama sibuka nezingane.
“Basuke lapho bamhlalisa phansi, bethi makakhulume iqiniso. Ngaleso sikhathi bebeqhubeka nokuyishaya inkosi yize ibatshela ukuthi kayisazi isibhamu abakhuluma ngaso. Elinye lize kimina langibuza ukuthi uphi umfowabo wenkosi omncane, ngiliyalelile igumbi lakhe, safike sangamthola labe selingiqhumisa ngenkulu impama lithi mangikhulume iqiniso,” kusho undlunkulu.
Uthe ambuze imoto ayisho nohlobo lwayo, wawatshela ukuthi ikhona isegalaji, amyisa khona. Uthe nakhona afike ambuza ukuthi uyithathephi imoto okuthe uma ewaphendula, athi unamanga, yebiwe.
Uthi kusize ukuba kuqhamuke iveni yamaphoyisa aseMelmoth ebihambisana nonina abe eseqoqa ngokushesha aphuma angena ezimotweni.
UNdunankulu wenkosi, uMnu Lucky Nduna Zulu, uthe isizwe saseNtembeni sisashaqekile yisenzo samaphoyisa ngoba akhombise ukungayihloniphi inkosi ngalokhu.
Okhulumela uMnyango wezokuBusa ngokuBambisana nezoMdabu KwaZulu-Natal, uMnu Msawakhe Mayisela, uthe ubungakafiki umbiko ngokushaywa kwenkosi yaseNtembeni. Uyeluleke ukuba ivule icala.
“Besingakezwa ngalokhu kodwa izindaba ezinjena ziyethusa ngoba indlu yobukhosi bendabuko iyahlonishwa kakhulu. Wonke umuntu unelungelo lokuvula icala uma ebekwe isandla ngoba akukho emthethweni ukushaya umuntu,” kusho uMnu Mayisela.
UColonel Thembeka Mbhele, okhulumela amaphoyisa KwaZuluNatal, ukuqinisekisile ukuthi kunecala elivuliwe lokulimaza impahla emuva kokuba kufike abantu abazibize ngamaphoyisa befuna isibhamu esingekho emthethweni. Uthe akukaboshwa muntu, amaphoyisa asaphenya.