IVALIWE INDAWO YEZINTANDANE ESHOWE
IGCINE ivaliwe indawo ehlala izintandane eShowe emuva kwesigameko sokudlwengulwa kwamantombazanyana amane abegcinwe kuyona.
Kubikwa ukuthi le ndawo isivaliwe emuva kokuba kutholakale ukuthi kunezinto ezingekho okumele zilungiswe ezihambisana nemigomo yoMnyango wezokuThuthukiswa koMphakathi KwaZulu-Natal ukuze kuvulwe indawo enjengalena.
Lokhu kuqinisekiswe ngokhulumela lo mnyango, uNkk Ncumisa Ndelu, othe le ndawo, eyaziwa ngeThokomala Comina Foster Centre, isavaliwe okwesikhashana kuze kube kugcinwa yonke imithetho ehambisana nemigomo yokugcina izintandane.
Kwenzeka lokhu nje, kuzokhumbuleka ukuthi ILANGA ngeledlule libike kabanzi ngodaba lokuboshwa komfana (17) osolwa ngokudlwengula amantombazanyana abegcinwe nawo kuleli khaya lezintandane.
Kubikwe ukuthi izingane, okusolwa ukuthi zidlwengulwe ngumsolwa, zineminyaka ephakathi kweyisi-8 kuya kweli-15 ubudala.
Udaba lubhoboke ngemuva kokuba izingane bese zikhala uma sekufanele ziyolala egunjini lazo. Kuthiwa umsolwa ubezilinda zilale bese ezicathamela, azigile.
UNkz Ndelu uthi le ndawo izophinda ivulwe uma sekulungiswe konke lokhu osonhlalakahle abakufunayo kuleli khaya lezintandane.
“Singakuqinisekisa ukuthi le ndawo ivaliwe okwesikhashana emuva kokuba osonhlalakahle bethole ukuthi kunezinto okumele bazilungise, ezihambisana nemigomo yomnyango.
“Okwamanje izingane zisusiwe zayobekwa kwenye indawo ephephile kanti uma sebekulungisile lokhu okufunekayo, zizobuyiselwa,” kusho yena.
Umsolwa okwamanje ugcinwe endaweni ehlala izingane eziphula imithetho kanti kulindeleke ukuba abuyele enkantolo ngoLwesine.