U-Angie ukhala ngokushayelwa iKZN
UNGQONGQOSHE weMfundo eyisiSekelo kuzwe lonke, uNkk Angie Motshekga ( osesithombeni), ukhale ngokukhonjwa ngeminwe ephalamende ngenxa yezinkulumo zokuthi uMnyango wezeMfundo KwaZulu-Natal, kawenzi kahle kothisha.
Ubekhuluma engqungqutheleni yothishanhloko eqale ngoLwesine yasongwa ngoLwesihlanu ebihlelwe yiNational Teachers Union (Natu) eCoastlands, eThekwini.
UNkk Motshekga uthe ubese enawo umbiko oveza ukuthi kunezinto ezingahanjiswa ngendlela efanele KwaZulu-Natal. Uthe useke wakhuluma noNgqongqoshe walo mnyango, uMnu Mthandeni Dlungwane, ngalolu daba.
“Bese ngiluzwile udaba lokushoda kothisha ezikoleni ngaze ngamtshela uMnu Dlungwane ukuthi ngikhonjwa ngeminwe ngomnyango wakhe.
Ngamcela ukuba angenzele umbiko wokuthi kungani kumele kusayine izikhulu ezilinganiselwa kwezili-14 uma kufanele kuqashwe uthisha wesikhashana ngokwesekhula u-3 of 2018 okuthiwa ikhishwe wumnyango wakhe,” kusho uNkk Motshekga.
Uveze nokuthi akuphusile ukuba kuthengwe izinto okungavunyelwananga ngazo ngemali yezikole ekubeni kuhlale kunezinkinga zokushoda kwemali.
Ubephawula kulokho ngenkulumo evezwe yiSekela likaMengameli weNatu, uMnu Allen Thompson, okhale ngokuthi ezikoleni kunyimfika imisubelo ngendlela exaka ukwenza kunokuba kugcwale kakhulu okudingwa ngothisha, izincwadi. Uphakamise ukuba kuphenywe umnyango ngale misubelo.
UNkk Motshekga uthe bekungaba kuhle ukuba uMnu Dlungwane leyo mali (yemisubelo) uyizame ngaphandle, okungaba wuxhaso, ngoba lokhu (kwemisubelo) kuyimpilo yomuntu yangasese kanti okubaluleke kakhulu okuzosiza bonke abafundi.
“Nasephalamende kuyakhalwa kakhulu ngokuthi kunezinto ezingahambi kahle KwaZulu-Natal. UNgqongqoshe uDlungwane ngiyadinga ukuhlangana naye ngokukhulu ukushesha futhi nangalo lolu suku engilunqumayo lokuhlangana nezikhulu zale nyunyana mhla zingama-28 kwephezulu ukuze kucutshungulwe inkinga nenkinga. Uma kufanele ngimbize uMnu Dlungwane, ngizokwenza lokho ukuze lezi zinto sizozikhuluma naye ekhona,” kusho uNkk Motshekga.
Udalule nokuthi kuzosungulwa ikomidi lokuqondiswa kwezigwegwe elizobhekana ngqo nezinkinga njengoba kunezikhalo eziningi ezithinta othisha.
Kule ngqungquthela bekuhlangene bonke othishanhloko abangaphansi kweNatu, bevela kuzo zonke izifundazwe zakuleli.