OTHISHA BATHI BAYATHETHISWA EMASEKETHE
OTHISHANHLOKO sebelubike kuNgqongqoshe weMfundo eyisiSekelo, uNkk Angie Motshekga, usizi lokuthethiswa okwezingane ezincane, abakhala ngokuthi babhekana nalo uma behambele emasekethe, abathi kwenziwa ngabaqondisi emahhovisi ezemfundo ezifundeni.
Lokhu kushiwo nguMengameli weNational Teachers Union (Natu), uMnu Sphosethu Ngcobo, engqungqutheleni yothishanhloko abangamalungu abo eqale ngoLwesine yasongwa ngoLwesihlanu eThekwini. Utshele uNkk Motshekga ukuthi othishanhloko abasakwazi ukwenza umsebenzi wabo ngokukhululeka ngenxa yokuthethiswa yizikhulu ezilingana nabo imbala.
“Umnyango wasungulelwa ukweseka bonke othisha ngokulinganayo, kubalwa nezimenenja imbala. Kubuhlungu esikubona kwenzeka kothishanhloko bethe- thiswa okwezingane ekubeni nabo beqashwe wumnyango. konke abakudingayo ukufukula imfundo kodwa bayakhacwa. Izinto zokusebenza azifikanga kwezinye izikole kanti kwezinye zifike emuva kwesikhathi ebesifanele,” kusho uMnu Ngcobo.
Kubuye kwakhalwa ngokumakiswa kothisha basemaPrimary amaphepha kamatikuletsheni kwezinye izikhungo.
Isikhulu esiphezulu sakwaMalusi, okuwuhlaka olubhekelela ukumakwa kwamaphepha, uDkt Mafu Rakometsi, sithe banayo inkinga yothisha abangamaki ngendlela amaphepha.
Unxuse othishanhloko ukuba baziqeqeshele othisha babo ngendlela efanele yokumaka ukuze izinga lenyuke.
Othishanhloko baphakamise nokuthi abafundi banikwe iphuzu uma beshoda ngelilodwa ukuze baphase.
UDkt Rakometsi ukuchithile lokho, wathi umfundi kumele athole iphuzu elimfanele.
mthobisis@ilanganew.co. za