Sebephose ithawula ngowezemfundo
Othisha bawusola ngokungazigqizi qakala izikhalo zabo
BAZWAKALISE ukuthi sebephose ithawula ngoMnyango wezeMfundo abawusola ngokungazishayi mkhuba izikhalo zabo, othisha baseThembalihle Primary School, eNagina entshonalanga yeTheku.
Labo thisha abali-12 abebezifikele mathupha emahhovisi eLANGA, amagama abo esiwagodlile ukubavikela njengoba bengavumelekile ukukhuluma nabezindaba, bathi sebebhale izincwadi eziningi beziyisa kumqondisi wezemfundo lesi sikole esingaphansi kwakhe, kodwa lutho ukusizakala.
Bakhala ngokuthi lesi sikole sesifana ne- spaza shop. Bafike beziphethe izincwadi abathi umnyango kawuziphendulanga. Labo thisha bathi kulesi sikole abafundi bakwaGrade R, bakhokha u-R300 ngonyaka.
Le mali bathi ibisiza ukuholela uthisha wakwaGrade R kodwa bathi lokho kakusenzeki.
“Le mali kayisadluliselwa kuthisha wakwaGrade R yize abafundi besaqhubeka nokuyikhokha. Uma sicela izinsiza kusebenza njengamafayela esigcina kuwona umsebenzi, kukhalwa ngokuthi kayikho imali.
"Kasikaze sichazelwe nxa kuqala unyaka ukuthi isimo semali simi kanjani kulesi sikole. Kunjalo nje kulesi sikole sizithengela ngisho amafayela namapeni ngoba kuhlale kuthiwa kayikho imali. Kawukho umhlangano obanjwayo. Uma kwenzekile wabizwa umhlangano, sisuke sizosatshiswa ngokuxoshwa.
"Kulesi sikole kunezikhala zothisha ezingagcwalisiwe, umsebenzi wonke wethweswa othisha ukuba bawenze ekubeni umthetho uthi wonke umuntu kumele angene ekilasini nxa kushoda. Unogada okufanele ahlale esangweni lesikole aqaphe, utholakala esewasha izimoto zabaphathi,” kuzikhalela labo thisha.
Bathi kwenye yezincwadi abayibhalele umnyango wezemfundo, bebefuna ukuba uziphenyele wona lezi zinsolo kubalwa nokuqashwa kothisha ababili kusona.
Ethintwa uthishanhloko walesi sikole, uMnu Mbongeni Dlamini, ukuba aziphendulele ngokushiwo ngesikole sakhe, uthe bahubhuza amanga aluhlaza cwe labo thisha. Uthe uma benenkinga ngendlela okuphethwe ngayo isikole, bekufanele baxhumane nomhloli noma umnyango obaqashile.
Unxuse ukuba kuthintwe umnyango. Okhulumela uMnyango wezeMfundo KwaZulu-Natal, uMnu Kwazi Mthethwa, uthe uma othisha benobufakazi obuqanda ikhanda bokuthi uthishomkhulu uyathinteka kulezi zinsolo abazibekayo, kumele beze nabo kubona ukuze kwenziwe uphenyo bese kuthathwa izinyathelo ezifanele.