IMVULA IPHAZAMISE I-POOL PARTY
BAJUXUZE ngaphandle kwamanzi abantu abebehambele iRUN Dbn pool party ebibanjelwe eMarmalade, eDurban North.
Abantu abebehambele lo mcimbi ubungafunga ukuthi beze emcimbini othize nje njengoba bebengakulungele ukubhukuda.
Isimo sezulu sibenze bakhohlwa wukuthi umcimbi abeze kuwona owokubhukuda.
Yize noma kunjalo, kodwa izinga lalo mcimbi beliphezulu, abantu abebewuhambele kungabantu abazihloniphayo bodwa.
Nakuba iziphuzo bezithe chithi saka kodwa akekho ophuze waphoxa omunye.
Izinga lomculo beliphezulu ikakhulu, ubungafunga ukuthi oDJ bayaqhudelana.
UDJ Stanky ushaye i- hip hop yakudala kwasangana inkundla.
Ngaphambi kwakhe bekungene uDJ Boonu yena obededela i- house epholile.
Bebungebuningi ubuso obaziwayo, kodwa bekuphithizela abantu abahle bodwa.
USweetsoul naye ubajabulise ngengoma ye- hip hop.
IGqom beliyivela kancane kulo mcimbi.
Nakuba bekungangenwa ngamali kodwa bekungena abamenyiwe kuphela. BEKUMINYENE utshumo ebheshini yokwamukela abafundi e-University of KwaZulu-Natal (UKZN) Howard College, ngoLwesihlanu ebusuku.
Lo mcimbi ocishe waphazamiseka ngenxa yemvula, bekumele ube sezinkundleni zemidlalo khona e-UKZN, kodwa kwagcina sekuphoqa ukuthi ube sehholo ngaphakathi ngenxa yesimo sezulu.
Abafundi bebegcwele bephuphuma ehholo, injabulo ibingabuzwa njengoba bebejuxuza baze baqukulane.
Amaciko abesina ededelana, kwadideka bona abafundi.
UDJ Bhoonu wodumo lwengoma uSwidi ungene wangachitha sikhathi kodwa wadedela i-Electro ebiyenza abafundi bagxume baze bathelane ngamanzi.
UTipcee namadada naye ungene kwezwakala kwazise usenezingoma eziningi abantu abazithandayo.
UDladla Mshunqisi obehambisana noBenny Maveric, bona bashiye abantu becela impinda.
UDladla ubelokhu ememeze njalo, ededela amatemu ahlukahlukene enjabulo.
Abafundi bebesangana ngaleso sikhathi befuna ngisho ukumthinta ngezandla, nokho kwangenzeka ngoba ezokuphepha beziqinile.
Ngemuva kwakhe kungene uDJ Feel yena ofike wadedela i- hip hop kwasangana abantu.
Umcimbi uvalwe ngehora lokuqala ezintathakusa. Uvalwe uDJ Touch of Soul obengomunye wabahleli bawo lo mcimbi.