U-Ayanda Msweli ulukhuphulile uKhozi
MHLELI: Ngifisa ukuncoma u-Ayanda “Ngwenya” Msweli ( osesithombeni) owethula isibikezelo sesimo semigwaqo oKhozini FM. Usezakhele ugazi kubalaleli ngamatemu ajwayele ukuwasho uma ethula isimi-nyaminya sezimoto emgwaqweni.
Baningi abantu abangabasakazi kodwa bese kuhluka ekutheni ukusakaza kwakho ukuthaka kanjani ukuze uzokwazi ukuheha indlebe yomlaleli. Ngeke ulizibe igama lakhe uma kukhulunywa ngabantu ababambe elikhulu iqhaza ekukhuliseni uKhozi FM.
Le nsizwa ikuthatha ikubeke uma kuziwa ekwethulweni kwesiminyaminya sezimoto emgwaqweni.
Ngiyacabanga ukuthi akakabi bikho okwazi ukwethula isimo semigwaqo njengoMsweli ngoba uvele weza nendlela yakhe ehlukile. Empeleni abantu abethula isiminyaminya emgwaqweni, kabanayo leya nto, bavele bahube nje kube sengathi yikhwaya.
Ungaze uzitshele ukuthi lena esuke ishiwo nguMsweli iyimfeketho nje. Ukusebenza kwakhe emaphoyiseni ezemigwaqo ngiyacabanga ukuthi nakho kumsizile kakhulu.
Phela ezinye zezinto ezimakhele ugazi umfokaNongalo kubalaleli boKhozi FM, wukuthaka inkulumo yakhe yesiminyaminya ngezaga, izisho nezifengqo okuyenza ishelele kamnandi.
Ubuye acaphume amavesi kwindoda emnyama eshaya ngomlomo obomvu asuke ezohambelana nalokhu afuna ukukudlulisa.
Kusuke kungaphelile ngalokhu esengikubale ngenhla, kodwa ubuye asebenzise nezinto ezisuke zisematheni ngaleso sikhathi.
Uma ungumuntu okhulele elokishini noma ezindaweni zomtakabani ungazazi izinto ezenziwa emakhaya, uzogcina usukwazi ngazo yize esuke ekukhela phezulu ngazo, bese kuba kuwena ukufuna ukwazi kabanzi ngazo.
Konke lokhu kusuke kuyimifakela uma ethula isiminyaminya sezemigwaqo. Leso siminyaminya sisuke siyimizuzu nje engafikile ngisho kweyisihlanu kodwa kukhona konke asuke ekusebenzisile, sisuke sesidlile esakeni. Akagcini nje ngokwethula isiminyaminya, kodwa uphinde axwayise abantu ngezinto ezingaba yingozi kubo- na. Uphinde asebenzisane kakhulu nabaphathi nabashayeli abasendimeni yezamatekisi ukuletha ubumbano. Ngiyafisa sengathi ongangena ezicathulweni zakhe, angathola uqeqesho kuye ukuze ezolandela ezinyathelweni zakhe yize engeke enze njengaye.