Kulahlisa ngethemba okwenzeka kwi-Safa
KUBUKEKA sengathi kumele sikhohlwe wukuthi singase sibone uzinzo maduzane kwiSouth African Football Association (Safa), ekhungethwe yizinkinga zemibango yezikhundla. Okulahlisa ngethemba ngokuxazululeka kwezinkinga zeSafa, wukubhukuda otakwini kweSouth African Sports Confederation and Olympic Committee (Sascoc), engumama wazo zonke izinhlangano zezemidlalo eNingizimu Afrika.
Nokho-ke siyethemba ukuthi kukhona okuhle okuzolethwa yizincomo zekhomishini ebijutshwe ukubhekana ngqo nezinkinga zeSascoc, eholwa nguGideon Sam. Le khomishini ibihleli okokugcina ngoLwesithathu njengoba sebefakaze bonke abebedingeka.
UJaji uRalph Zulman, obeyihola, sekulindwe ukuba adlulisele izincomo kuThokozile Xasa, onguNgqongqoshe wezeMidlalo, ukunquma ngokuzokwenzeka kwiSascoc egutshuzelwe yizinkinga okubalwa kuzona ukungezwani kwamalungu ebhodi nezinye izinhlangano zezemidlalo, ukungaqhutshwa ngendlela efanele kwemisebenzi nokubhubhudlwa bume kwemali yale nhlangano.
Ngaphezu kwalokhu, le khomishini ibibheka nokuxoshwa kwezikhulu ezisezikhundleni ezimqoka kule nhlangano okusolwa ukuthi bekuqhutshwa ngabathile ngenxa yemibango yamandla okuqhoqhobala umnotho wayo.
Ukudunguzela kweSascoc, kwenza ichithe isikhathi eside ezinkingeni zayo zangaphakathi bese ikhohlwa wukuhlinzeka ubuholi ezinhlanganweni ezingaphansi kwayo kubalwa neSafa.
Okuqaphelekayo ngeSafa wukuthi kayikho inqubekela phambili kuyona selokhu kusungulwe iFootball Transformation Forum (FTF), engene emandleni ngowezi-2009. Sikhuluma nje, iBafana Bafana iqophe umlando omubi iba ngeyokuqala emhlabeni ukuphuma ekuseni ingosokhaya bemidlalo yeNdebe yoMhlaba ngowezi-2010.
Ngemuva kwalokhu, iBafana iyibuke komabonakude iNdebe yoMhlaba njengoba ingayanga eBrazil ngowezi-2014, kanti kayilubhadi eRussia nonyaka.
Ukubhacaza kweBafana, yikhona okwahlulelwa ngakho ubuholi beSafa. Lokhu-ke kusidweba sicace isithombe sokuthi inqola ibheke eweni ngaphansi kweFTF. Kumanje uDanny Jordaan, ohola iSafa, uphansi phezulu ulwela ukuqhubeka nokuhlala kulesi sigqiki njengoba kuzokuba nokhetho mhla zingama-24 kwephezulu.
Nokho-ke lolu khetho kungenzeka luthathwe njengento engekho njengoba u-Andile “Ace” Ncobo ehoxile embangweni wesikhundla sikamengameli ezeseka ngokuthi akakwazi ukuba yingxenye yokhetho lwasehlathini. UNcobo ugxeka iSafa ngokuthi kayilisungulanga ikomidi lokhetho kusasele izinyanga eziyisi-6 ngaphambi kwalo.
Ukuphuma kwabakwa-IEC nabakwaKPMG ukusingatha lolu khetho, kumele kususe inkungu ezikhulwini ngokuthi kukhona ugcobho ngalo. Konke-ke lokhu kwenza kucace ukuthi impumelelo iyofika ebholeni cishe sekuphila esinye isizukulwane emhlabeni, hhayi kusekhona esamanje.