Iyakhula eyodlame lwabafundi kothisha
Yinkombankombane ngomsuka walesi sihlava
YINKOMBANKOMBANE endabeni yokuqubuka kodlame lwabafundi olubhekiswe kothisha eNingizimu Afrika.
Izinhlangothi ezithintekile ngunxantathu kwezemfundo othinta umfundi, uthisha nabazali. Lokhu kulandela ukusabalala ezinkundleni zokuxhumana komfanekiso womfundi wentombazane empisholo, eshaya uthisha wesifazane ongumlungu nge- notebook.
Kukhona futhi nomunye umfanekiso lapho ibhungwana lomfundi elingumlungu lihlasela ngomshanelo uthisha wesilisa naye ongowohlanga lwabamhlophe. Umbuzo omkhulu uthi ngubani okumele agxekwe ngale mpicabadala ebhebhetheka okomlilo wequbula kulezi zinsuku.
Empeleni uma ulalele abantu bephawula ngale mpicabadala, uthola ukuthi ngaphandle kukanxantathu kathisha, umfundi nabazali, lokhu kugxeka sekwenabele nakwezinye izigaba zomphakathi njengoba abanye besola uhulumeni ngemithetho yakhe emisha; ozihola phambili owukuqedwa kokujeziswa komfundi uma onile, kanti abanye basola umphakathi lapho abafundi bevela khona.
Emuva komhlangano wothishanhloko abangaphansi kwenhlangano iNational Teachers Union (Natu), obuCoastlands Hotel, eThekwini, ILANGA lixoxe kafushane nomengameli weNatu, uMnu Siphosethu Ngcobo, ngokungase kube yimbangela yalo mkhuhlane.
Uthe njengeNatu, bayawuhlonipha umthetho osebenzayo njengamanje, othi akusavumelekile ukujezisa abafundi ngokubashaya. Wathi ngeshwa kunezigameko lapho kunothisha abasaqhubeka nokwenza lokhu, njengoba sekuqhuma leli bhomu emehlweni manje.
Uqhubeke wathi khona lapho, ngeshwa ukuba khona kobuchwepheshe besimanje lapho okwenzekayo kuqoshwa kuthunyelwe ezinkundleni zokuxhumana, izigameko ezenzeka emagunjini okufundela, umphakathi kawube usathola ukusuka nokuhlala kwendaba - bese yonke into ithatheka ngehaba.
“Okunye okuyishwa wukuthi kayikabi khona inqubo esemthethweni ngokuphathwa nokusetshenziswa kwamaselula ngabafundi.
"Nakuba sikhona isidingo sawo uma kunezimo eziphuthumayo, kodwa sengathi bekungaba ngcono abazali banike abantwana uhlobo lweselula olukwazi ukudlulisa umyalezo kuphela esikhundleni salawo awubukhazikhazi anemininingwane engenasidingo nebalimazayo abantwa- na,” kusho uMnu Ngcobo.
Uphethe ngokuthi empeleni sesishayile isikhathi sokuba bonke abathintekile emfundweni yabantwana, bahlangane, kwakhiwe inqubo esemthethweni ngamaselula. Udaba lwamaselula luyingxenye yezinkinga kubafundi balesi sizukulwane.
Phakathi kwezinye izinto ezibikwayo, wukuthi abafundi bayaphazamisa ngesikhathi kufundwa ngokubanga umsindo ngamaselula nokulibala wukuwacofa, bangalaleli uma kufundwa.
ILANGA lithinta unobhala weSouth African Democratic Teachers Union (Sadtu), KwaZulu Natal, uNkz Nomarashiya Caluza, naye uhambe kuwo amagama kaMnu Ngcobo ngenkinga yokusabalala kobuchwepheshe besimanje.
Impendulo yakhe uyigoqe ngokuthi ukuziphatha kanje kwabantwana kuyisibuko somphakathi abaphuma kuwona.
Uyichithile eyomthetho wokuqedwa kwelungelo lokujezisa abantwana ngoswazi, esho nokuthi sekunesikhathi lavalwa, kodwa lokhu okwenzekayo manje kusha. Uthe kunesimo esiyimpicabadala ngobuchwepheshe ngoba kuke kube nesidingo sokuba abantwana bathungathe ulwazi, abasizwa kukhona amaselula anobuchwepheshe.
Le mpicabadala uthe idalwa wukuthi nalapho b e k uzosetshenziswa i- computer, kodwa ubugebengu budlangile njengoba ezikoleni kugqekezwa kwebiwe lawo ma- computer.
Kuthi lapho sekubanjwa abenze lokhu, kuvumbuke abanye kubafundi phakathi kwabasolwa. Maqondana nekhambi lale nkinga uNkz Caluza uthe njengamanje kunomhlangano wabo bonke abathintekile ohlelwayo, imininingwane yawo ezomenyezelwa maduzane uma amalungiselelo esephothuliwe.
BATHINI ABANTU? Uma ulalele abantu bemikhakha eyahlukene bephawula, ugcina usuzulelwa yikhanda ngokuthi ingabe yimuphi phakathi kwabo oshaya emhloleni ngembangela yodlame lwabafundi kothisha.
Kukhona abathi abazali banamuhla abasawenzi umsebenzi wabo wokuqeqesha abantwana ngenhlonipho. Izingane ziwumphumela wokwahluleka kwabazali babo ukubafundisa inhlonipho.
Abazali banamuhla badudulela kothisha umsebenzi okungowabo, benjalo nje, abayihambeli imihlangano yesikole ukuze bazi ngokwenzekayo.
Babodwa abathi okunye o k u yimbangela yokuba ngamahlongandlebe kwabantwana, yingoba bazalwa yizingane ezisencane kwazona.
Kukhona nabathi abafundi banjena nje, benziwa yibona othisha abanye babo ababuye babone izintombi kubona, balale nabo. Uma sekunjalo labo thisha abasenalo izwi lokweluleka labo bantwana.
Bese kuba khona abathi izinto zinjena nje, nguhulumeni owaqeda uswazi ezikoleni. Ngakolunye uhlangothi, labo abasho lokhu babonakala beshesha ukuyilibala imibiko esabalele nezwe lonke yokuhlukunyezwa kwezingane ngothisha abasebenzisa isihluku ngokweqile uma bethi bayazijezisa.