Yisinqumo senkantolo esingaqeda ukukhuluma ngoZuma PHILANI MGWABA
ISISHO sesiZulu esithi lithatha osemnyango limphose emsamo, siyahambelana nokwehlele lowo obengumengameli wezwe, uMnu Jacob Zuma.
Cishe naye akakholwa wukuthi emuva kweminyaka ecishe ibe lishumi amacala enkohlakalo okuthiwa wawenza nalowo owayengumeluleki wakhe wezimali, uMnu Schabir Shaik, ahoxiswa nguMshushisi omkhulu owayebambile ngaleso sikhathi, uMnu Mokotedi Mpshe, asephinde avuka futhi.
Lokhu kulandela isimemezelo sikaMshushisi omkhulu oyinhloko yeNational Prosecuting Authority, uMnu Shaun Abrahams, asenze ngoLwesihlanu sokuthi uMnu Zuma uzoshushiswa ngamacala ali-16, okuthiwa wawenza ngesikhathi e s e ngu ngqongqoshe wezomnotho KwaZulu-Natal ngeminyaka yo-1990.
UMnu Shaik watholwa yinkantolo yamajaji enala macala ngowezi-2005, okwaba nomphumela wokuba uMnu Zuma, owabe esekhushulelwe esikhundleni sokuba y isekelamengameli lezwe, axoshwe esikhundleni yilowo o wayengumengameli ngaleso sikhathi, uMnu Thabo Mbeki.
Noma uMnu Zuma wayekubeke kwacaca ngesikhathi ebekwa la macala phambilini ukuthi ufuna (icala) liqulwe ukuze ageze igama lakhe ngokukhishwa phambili yinkantolo, isenzo sakhe sokusebenzisa abameli abakhokhelwa ngabakhokhi bentela ukuzama ukuthi la macala achithwe engakaqulwa nokuqulwa, sikhombisa ukuthi vele kwakukhohliswa izwe lapha.
UMnu Zuma wayehlala etshela izwe ukuthi la macala kwabe kuyitulo lokumhlinzela ezibini, atholwe enecala ukuze engezobekwa esikhundleni sokuba ngumengameli wezwe. Osekucace bha manje wukuthi uMnu Zuma wayevele engazimisele ngokugezwa igama lakhe yinkantolo; empeleni wayehlose ukuba la macala adliwe yinja, aphelele emoyeni.
Nokho-ke nesiZulu siyasho ukuthi akukho qili lazikhotha emhlane; emuva kweminyaka eli13, uShaik atholwa yinkantolo ukuthi wayenza le nkohlakalo enuka uMsholozi, la macala, asebuye avumbuka futhi.
Kubukeka sengathi okucabe indlela yokuvusa la macala, wukukhishwa esikhundleni sokuba ngumengameli wezwe kukaMnu Zuma ngenyanga edlule, kwangena esihlalweni uMnu Cyril Ramaphosa.
Ukungabi namandla okusebenzisa isikhundla sombuso sokuba ngumengameli ukulwa nokuvuswa kwamacala kushiye uMsholozi engavikelekile, kwanika umshushisi omkhulu nabasizi bakhe isibindi sokuvusa icala elidala, ngaphandle kokwesaba ukuthi bangaphelelwa wumse- benzi uma bethatha lesi sinqumo.
Phela uMnu Zuma usefana nje nezinye izakhamizi ezweni, akasenalo ihawu lokuba ngumengameli, obekuyisikhundla ebesimvikela ngoba besimnika amandla okuqasha nokuxosha izikhulu zikahulumeni, kuhlanganisa nongqongqoshe imbala.
Okuhle ngokwenzekile wukuthi kuyisibonelo esihle sokuthi sonke siyalingana emehlweni omthetho, noma ngabe ungumengameli noma ungumuntukazana.
Kodwa-ke kubukeka sengathi luselude ukhalo ngaphambi kokuba icala liqulwe.
Ummeli kaMnu Zuma, uMnu Michael Hulley, usedalule ukuthi uMsholozi angase anikele enkantolo futhi, afake isicelo sokuba isinqumo sokumshushisa sichithwe.
Ukwenza njalo kuyilungelo lakhe uMsholozi, ukuzivikela kokungase kumehlele uma engatholwa enecala. Nokho lokhu kufanele kushiwo; uMnu Zuma akasakhankasele sikhundla, usethathe umhlalaphansi, ngakho-ke ngeke esakwazi ukusebenzisa ibhaxa lokuthi isinqumo sokumshushisa, yitulo lezitha zakhe kwezombusazwe ukuzama ukumvimba ukuba anganyuselwa ezikhundleni eziphezulu.
Okungaba kuhle, futhi okungaqeda ukukhuluma okungapheli ezweni, wukuba liqulwe icala, kube yinkantolo enquma ukuthi umsulwa yini uNxamalala noma cha.
Uma leli cala lingaqulwanga yinkantolo, yathatha isinqumo esiwujuqu, kuyohlala kunefu elimnyama mayelana negama likaMsholozi nemibuzo engenazo izimpendulo ngokuthi ngabe wawenza yini la macala anukwa ngawo noma cha.
Yinkantolo kuphela engaqeda ukukhuluma okungapheli.