Ubongelwe yizingqwele ephula irekhodi lakuleli
Uphule irekhodi likaWayde
UBONGELWE ngumpetha wase-Afrika kwi-200m uClarence Munyai ophule irekhodi laseNingizimu Afrika kwiSouth African National Track and Field Championships eqale ngoLwesine yasongwa ngoMgqibelo eTuks Stadium, eTshwane.
UMunyai ugile izimanga ephula irekhodi lika-Wayde van Niekerk kwi-200m u-19.84 wabeka u-19.69 ehluleka ngomzuzwana ukwenza u-19.68 ophethwe nguFrankie Fredericks waseNamibia.
ILANGA lithole ngoMengameli we-Athletics South Africa (ASA) u-Aleck Skhosana ukuthi uFredericks uthumele amazwi okumhalalisela uMunyai ngokwenza kwakhe irekhodi lakuleli.
Ukwenza kahle kukaMunyai oneminyaka yobudala engama-20 kwenza abe makhulu amathemba okuthi akusensuku zatshwalwa ukuba lephulwe irekhodi laseAfrika.
Ongoti abebehambele lo mqhudelwano bathi ukube bekukhona u-Anaso Jobodwana belizokwephuka irekhodi likaFredericks. UMunyai wenze lesi sikhathi kwisemi final emdlalweni akalibambanga iqhaza kowamanqamu.
ILANGA lithole ngoMengemeli we-ASA uSkhosana ukuthi uMunyai ulimalile okuphoqe ukuba angakwazi ukubamba iqhaza kowamanqamu.
USkhosana uthi bekungokokuqala ukuba lo mqhudelwano udlalwe izinsuku ezintathu kwazise phambilini ubugijinywa izinsuku ezimbili.
“Ingithokozise kakhulu indlela imidlalo ehambe ngayo. Sibone amarekhodi amaningi kuyo.
UMunyai osanda kuphuma kumajuniya ungimangaze kakhulu ephula irekhodi lakuleli le-200m wahluleka ngomzuzwana ukuphula elase-Afrika.
Abanye abasubathi abenze kahle nguCarina Horn ophule elakhe kwi-100m wabeka u-11.03, uThando Dlodlo, uVan Der Walt nabo ngabanye abenze amarekhodi.”
“Kujabulise kakhulu ukuba khona koCaster Semenya owenza isikhathi esingu-1:57 kwi-800m okuyisikhathi angakaze asenze kuleli kanti wenze kahle nakwi4x400m,” kusho uSkhosana.
Ngemuva kwemidlalo uCaster uthe usebheke imidlalo yamaCommonwealth Game lapho ezokwenza u-800m no-1500m. Uthi kumjabulise kakhulu ukubona inkundla igcwele. Uthe kumnikeza ithemba lokuthi akusensuku zatshwala ezokugijima zibuyelwe yisithunzi kuleli.
USihlalo weKZNA kwiTrack and Field uKhulezweni Buthelezi uncome abasubathi besifundazwe ngokubuya nezindondo eziyisi-6 kulo mqhudelwano.
Abasubathi a baphakamise ifu leg i lesifundazwe ngu Nkosi nathi Sibiya obe yingqwele ye-1500m, uZakithi Nene ongene isibili kwi400m, uCassidy Williamson ohlomule ngeyethusi kwi-200m ukubala nje abambalwa.
Ukwenza kahle kwesifundazwe kubongwa amagalelo kaMichael “Sponge” Seme oqashwe iKwaZulu-Natal Athletics (KZNA) nyakenye ukuba azovumbulula ikhono esifundazweni. USeme uzakhele ugazi ngowezi-2009 ngesikhathi uCaster ebuya nendondo yegolide kwi-800m kwi-International Association of Athletics Federation (IAAF) World Championships, eGermany.