ILUDONGA BOXING IZOQHATHA IMPI YEBHANDE LE-IBF
UZOQHATHWA yiLudonga Boxing Promotions u-Innocent Mantengu waseMtubatuba, okuhlelwa ukuthi abhekane noDoctor Ntsele waseFree State, empini ye-International Boxing Federation (IBF) All Afrika Bantamweight mhla zingama-28 kuMbasa (April) eMtubatuba.
UMantengu usefudukele eGoli njengoba efuna amadlelo aluhlaza. Ubengaphansi kweThekwini Boxing Gym eholwa nguThulani “Nkunzi” Magudulela okunguyena futhi ophethe iLudonga Boxing Promotions.
UMantengu uthi uye eGoli ngoba efuna ukuqhuba nomsebenzi awufundele wokuba nguthisha.
“Angixabene noMagudulela. Uyohlale engubaba kimina. Ngize lapha eGoli ngoba ngifuna ukukhula esibhakeleni.
"Okunye okungilethe lapha wukuthi maningi amathuba omsebenzi wobuthisha. Sesiqede konke noMagudulela ngenkontileka. Ngimbonga kakhulu ngokungihlelela le mpi.
"Kumanje ngimatasa ejimini ngilungiselela yona le mpi engizokube ngivikela kuyona ibhande lami,” kusho uMantengu.
UMagudulela ukuqinisekisile ukuthi sebeyisayinile inkontileka noMantengu.
“UMantengu uhambe kithina simatasa nokumhlelela impi. Ngibone kungcono ukuthi ngiqhubeke nokuyihlela yize esehambile ngoba bese kukuningi osekwenziwe.
"Ngizoqhubeka nokumsiza nxa edinga izimpi ngoba asixabene yikhona nje ukuthi ufuna amathuba angcono. Amabhokisa kumele aqonde ukuthi kumba eqolo ukuhlela impi njengoba sintula nabaxhasi.
"Ngiyaqonda ukuthi nawo afuna ukukhula esibhakeleni futhi adinga nemali.
"Inkinga wukuthi kuyabiza ukuhlela impi futhi ngeke alwe wonke ngesikhathi esisodwa,” kusho uMagudulela.