Kubhuntshe umdlalo ngenxa kazamcolo
Ukumiswa kwawo bekuphephisa abadlali
KUBHUNTSHE umdlalo weSouth African Football Association (Safa) KwaZulu-Natal ABC Motsepe League ngenxa kamzacolo obugubuzele lesi sifundazwe.
ILANGA lithole ukuthi umdlalo weMaritzburg City neSes’Khona FC obekumele ugijinywe ngoMgqibelo ntambama eNorthdale Stadium, eMgungundlovu kawubanga usabakhona ngenxa yemvula edale ukuthi konakale inkundla.
Kuthiwa onondweba abebephethe lo mdlalo baphoqelekile ukuthatha isinqumo sokuthi ungagijinywa ukuze abadlali baphephe.
Kuthiwa inkundla beyigcwele amanzi kucaca ukuthi ngeke kudlaleke.
U-Andile “Sguda” Cele ocija iCity utshele ILANGA ukuthi uhlehlisiwe lo mdlalo ngenxa yenkundla bekungeke kudlaleke.
Uthi bazozwa ngehhovisi leSafa ukuthi lo mdlalo uyophinde udlalwe nini.
Kwenzeka konke lokhu iqhubekile eminye imidlalo ebikhona kwezinye izinkundla kuso sonke isifundazwe.
UMvoti uhlule iMilford ngo-1-0 wegoli likaBonginkosi “Laffor” Nyembe ngomzuzu wama-26 ngoMgqibelo ntambama eMhlathuze Sport Complex, eRichards Bay.
Lo mphumela unike ithemba uMvoti FC lokuyomela lesi sifundazwe emidlalweni yokuhlunga uma kuphela isizini.
I-KwaDukuza United iqoqe amaphuzu amathathu ngesikhathi ishaya iLadysmith United ngo-1-0 ngoMgqibelo ntambama koweligi eDarnall Stadium. Igoli enqobe ngalo iKwaDukuza libekwe enethini nguButi “Scara” Gatebe.
IGreenWood Park Friends icazelane amaphuzu ne-Edendale Juventus ngo-0-0 ngoMgqibelo eWorkington Stadium.
Kuzo ezeMotsepe League, uVuyisile Wana noLuyolo Nomandela oke wagijima kuMthatha Bucks usejoyine iTornado FC egijima kwi-Safa Eastern Cape ABC Motsepe League.
Isiyonke imiphumela yemidlalo yeSafa KZN ABC Motsepe League ihambe kanje:- Milford FC 0, uMvoti FC 1; Friends 0, Juventus 0; Drakensburg 1, Dynamos 0; Wanderers 1, Ashley 0; KwaDukuza 1, Ladysmith 0.