Uziba eyesicoco owePirates
Uthi usemningi umsebenzi omhlalele
UMQEQESHI we-Orlando Pirates ubona usemkhulu umsebenzi omhlalele ukuze le kilabhu ibe yilokhu akufunayo.
IBucs iguqise ngo-1-0 iLamontville Golden Arrows kowe-Absa Premiership ngoMgqibelo kusihlwa ePrincess Magogo Stadium, KwaMashu.
Amagoli anqobise iBucs lo mdlalo ashaywe ngoThembinkosi Lorch noMthokozisi Dube, eleArrows lona lashaywa nguJabulani “Mjafefe” Shongwe.
ULimbikani Mzava odlala emuva kwi-Arrows akawuqedanga lo mdlalo ekhishwa ngephutha ngunondweba ngekhadi elibomvu.
Umuntu obenze icala nguMzwandile “Gravel” Buthelezi.
UMilutin “Micho” Sredojevic ocija iBucs uthi usemkhulu umsebenzi okusafanele awenze kule kilabhu ukuze ibhubhise kwasani.
“Ngijabule ngoba siwunqobile umdlalo kodwa kunezinto engingagculisekile ngazo.
"Bese sihamba phambili ngo-2-0 kodwa savumela ukuthi i-Arrows ebishoda ishaye igoli.
"Lokhu kuyizinkomba zokuthi kuningi okusafanele sikwenze.
"Awukwazi ukuvuzisa igoli ngemizuzu yokugcina, yisimo esingamukelekile leso.
"Siyahluleka wukuqedela imidlalo yalolu hlobo. Lo mdlalo besiwuthwele kodwa sahluleka wukuqeda ngawo ngokushesha,” kusho uSredojevic.
Mayelana nethuba lokunqoba isicoco seligi uthe: “Okwamanje angifuni ukwanda kakhulu ngamathuba ethu okunqoba isicoco seligi ngoba akukho sezandleni zethu.
"Siphambili ngomdlalo kwiMamelodi Sundowns eqhwakele iphinde ibe phambili kunathi ngamaphuzu, ngakho-ke asifuni ukucabanga kakhulu ngeligi.
"Sizokhuluma ngayo uma sekusondele ukuphela kwesizini,” kusho uSredojevic.
UClinton Larsen ololonga i-Arrows uthi ezakhe zidlale kahle yize bese zishoda.
“Ukuphuma kukaMzava kwenze izinto zanzima kodwa ngiyasibonga isibindi esikhonjiswe ngabadlali bami yize bese sishoda.
"Badlale kahle kakhulu bebezinikele kulo mdlalo ngendlela eyisimanga.
"Ukube besiphelele mhlawumbe bekuzokhulunywa enye indaba. Ngiyayibongela iPirates isinike umdlalo omnandi,” kusho uLarsen.
Okwamanje angifuni ukwanda kakhulu ngamathuba ethu...