I-PMB UTD IGAQELE UMDLALI WE-CHIEFS
IMARITZBURG United ifuna ukumsayinisa ngokugcwele umdlali emboleke kwiKaizer Chiefs.
IMaritzburg iguqise ngo-2-1 iPolokwane City kowe-Absa Premiership ngoLwesihlanu kusihlwa eHarry Gwala Stadium, eMgungundlovu.
Abalandeli beMaritzburg bamemeza inkundla yonke befuna kufakwe uWilliam Twala obesebhentshini.
UFadlu Davids unqume ukumfaka sekusele amanenjana umdlalo uphele.
Ungene wangalithinta nhlobo ibhola umdlalo wabe usuphela.
Okwethusile wukuthi abalandeli bakhombisa ukumthanda nje kweminye yemidlalo yeMaritzburg baphendule izandla befuna akhishwe.
UTwala ujoyine iMaritzburg maphakathi nesizini emva kokuba ubekhuhla ibhentshi kwiChiefs.
Inkontileka yakhe neChiefs ivele iyaphela uma kusongwa isizini.
Leli phephandaba lithole ukuthi iMaritzburg ifuna ukumsayinisa ngokugcwele.
Nokho kuthiwa ikhala ngetshe lemali ayihola kwiChiefs.
Leli phephandaba libuza uFarook “Ntshebe” Kadodia umnikazi weMaritzburg ukuthi ngabe kuyiqiniso yini ukuthi bamfuna ngokugcwele uTwala uthe:
“Kuyiqiniso ukuthi sifuna ukumsayinisa ngokugcwele ngoba simubona esazoba wusizo ekilabhini.
"Kodwa bayakwazi okufanele bakwenze nomphathi wakhe, angeke ngikwazi ukukusho kwabezindaba,” kusho uKadodia.