ABALANDELI BE-CHIEFS BAGXEKA IZINQUMO ZIKAKOMPHELA
UMLANDELI wokuqina weKaizer Chiefs ugxeka izinqumo zomqeqeshi wale kilabhu akholwa wukuthi yizona ezenza le kilabhu inganqobi lutho.
IChiefs idumaze abalandeli bayo ibambana ngo-0-0 naMaZulu FC kowe-Absa Premiership ngoMgqibelo kusihlwa eFNB Stadium, eSoweto.
IChiefs bekubhekwe izenzele kuMaZulu njengoba isefomini kulezi zinsuku.
Nokho uSuthu luyivove inkani lwabuya nephuzu eSoweto.
Omunye umlandeli wokuqina weChiefs ocele lingadalulwa igama lakhe utshele leli phephandaba ukuthi uKomphela kufanele azisole yena.
“IChiefs ikulesi simo nje yingenxa yezinqumo zikaKomphela. Bheka nje kula masizini edlule usayinise abadlali abangazange basisize ngalutho, wahambisa abadlali abadlala kangcono.
"Uyichaza uthini nje indaba yokuxosha uSiyanda Xulu.
"Buka into ayenza kwiMaritzburg United njengamanje uzihlula zonke izitobha esinazo.
"Angayichaza athini nje eyokuxosha uXulu.
"Uthengelwe uNtshangase kodwa akamsebenzisi.
"Kuyacaca ukuthi uyena ohluleka ukusebenzisa abadlali.
"Sesilinde kuphele isizini ahambe asisenandaba nokwenzeka manje akusazweli,” kusho lo mlandeli.
UKomphela uzwakalise ukuphoxeka ngokulahla amaphuzu kwezakhe.
“Sizenzele umsebenzi wanzima ngokulahla amaphuzu.
"Amathuba okunqoba isicoco seligi aya ngokufiphala.
"Kodwa-ke asililahlile ithemba kuzofanele sivuke sizithintithe siqale sinqobe imidlalo,” kusho uKomphela.
UCavin Johnson ocija uSuthu uthi ujabule ngephuzu ababuye nalo.
“Lo mdlalo besingawunqoba nathi siwatholile amathuba basizwa ngunozinti wabo u-Itumeleng Khune. "Kodwa-ke ngijabule ngephuzu esibuye nalo kulo mdlalo. "Sizosebenzela phezu kwalo ngoba akufani nokungatholi lutho,” kusho uJohnson.