OWE-RICHARDS BAY UNETHEMBA NGEZEMBE
KUMNIKA ithemba lokuvika izembe umnikazi weRichards Bay FC egijima kwiNational First Division (NFD) uS’fiso “Jomo” Biyela eguqise iTshakhuma Tsha Madzivhandila FC (TTM) ngo-1-0 koweligi ngoMgqibelo ntambama eThohoyandou Stadium, eLimpopo.
Igoli enqobe ngalo iBay FC libekwe enethini nguStanley Muishond ngomzuzu wama-70.
Le wini ilethe enkulu injabulo kuBiyela kwazise iqinise ithemba lokuvika izembe kule kilabhu engakaqedi ngisho unyaka izelwe.
UBiyela exoxa neLANGA izolo ngeSonto ekuseni ulibeke ngembaba elokuthi ezakhe ngeke zigencwe yizembe. Uthi empeleni kakuyona indawo okufanele ngabe bakuyona le eyokuvika izembe kwazise unabadlali abaseqophelweni eliphezulu.
Nokho uthi ukuba nabadlali abahle kakusho ukuthi nemiphumela izoba mihle.
UBiyela uthe: “Yiqiniso ukuthi ebholeni kwenzeka noma yini. Ngendlela abadlali bami abaziphathe ngayo ngoMgqibelo kunginike elikhulu iqholo lokuvika izembe.
"Bekucacela ngisho ingane ukuthi umdlalo sizowunqoba ngenxa yobumbano olubonakale enkundleni kanye nokulwela ukuvikela isithunzi sekilabhu. Ngikholwa wukuthi umdlalo weNedbank Cup weLast16 neBloemfontein Celtic usifundise lukhulu. KoweCeltic abalandeli bebebalelwa kwizi-6000 kuyaphezulu ngokunjalo nangoMgqibelo bekuyisimo esifanayo kodwa sabuya nawo amaphuzu.
"Ngikholwa wukuthi sidinga ukunqoba imidlalo emibili bese siphuma ngokugcwele ezembeni,” kusho uBiyela obezwakala ukuthi uyaqhuma yinjabulo.
Lesi sikhulu sibuye sabonga abalandeli bale kilabhu abawa bevuka nayo kunzima.
Kuzo ezeNFD, iRoyal Eagles iguqiswe yiSuper Eagles ngo-1-0 koweligi ngoMgqibelo ntambama eGoble Park Stadium, eFree State. UThapelo Selepe nguyena obe yiqhawe eshayela igoli enqobe ngalo iSuper Eagles.
Kusenjalo uThongathi FC lubuya namaphuzu agcwele kuMthatha Bucks lunqoba ngo-2-1 eMthatha Stadium.
IBucks iyona evule inethi ngesikhathi uMpho Erasmus eyishayela igoli ngomzuzu wesibili, kwathi awoThongathi FC amabili eza noSiyabonga Vilane obeyiphela endlebeni kwizitobha zoMthatha Bucks.
Isiyonke imiphumela yemidlalo yeNFD ebisezinkundleni ezahlukene ihambe kanje:- All Stars 2, Stellenbosch 0; Jomo Cosmos 3, Ubuntu 1; Real Kings 1, Black Leopards 2. ; Tshakuma 0, Richards Bay 1; Mthatha 1, uThongathi FC 2; Super Eagles 1, Royal Eagles 0; Tuks 1, Spurs 1; Highlands Park 7, Mbombela 1.