IWits iwashiswe ijezi ekuseni kwiCaf
Sebethembe ukugxila kweyeligi
SEYIBHEKE ukwenza kahle kwi-Absa Premiership iBidvest Wits ephume kabuhlungu kwiCaf Champions League iguqiswa yiPrimeiro de Agosto yaseMozambique ngo-3-2 kumaphenathi ngoMgqibelo ntambama eBidvest Stadium, eGoli.
Lo mdlalo ubuphele ngo-1-0 kunqoba iWits ngegoli lika-Elias Pelembe kodwa kwaba ngu-1-1 sekuhlanganiswe yomibili imilenze okwenze waya emaphenathini.
Kubadlali abenzele phansi ezikaGavin Hunt ngokuhlulwa amaphenathi kube nguLehlohonolo “Major” Majoro, uDaine Klate noElias Pelembe.
US’fiso “Choppa” Hlanti odlala ophondweni lwesokunxele emuva kwiWits utshele ILANGA izolo ngeSonto ekuseni ukuthi sebebheke ukuzithoba amanxeba ngemidlalo yeligi kwazise nakuyona kabamile kahle.
Uthi bazisola bona njengabadla- li ngokuphuma kule midlalo yaseAfrika. Uthi bebazi ukuthi izimbangi zizopaka ibhasi emuva.
UHlanti uthe: “Besinethemba lokuthi sizobahlasela ngokuzuma kwasho khona ukuthi izinto kazilungi. Kodwa-ke kufanele siwamukele umphumela. Mhlawumbe kube yinhlanhla ukuthi siphume kwi- Nedbank Cup nakulo wase-Afrika ukuze sikwazi ukubhekana neligi kwazise nayo imqoka izinto kazihambi kahle.
"Kubi kakhulu kwazise nomqeqeshi wethu (uGavin Hunt) uphume enkundleni engeneme. Wonke umuntu uthukile ngendlela esiphume ngayo.
"Sekufanele sizame ukulwela ukungena kule midlalo ngesizini ezayo,” kusho uHlanti.
Khonamanjalo iSuperSport United ibuyise ithemba idlulela emzuliswaneni olandelwayo weCaf Confederation Cup ishaya i-Athletico Petro Luanda yase-Angola ngo-2-1 ngoLwesihlanu kusihlwa eLucas Moripe Stadium, ePitoli. Igoli elivule inkundla kulo mdlalo libekwe enethini ngu-Denies Pedro ngomzuzu wama-48 kwathi uThabo Mnyamane wavalela amabili ngomzuzu wama-77 nangowama-82.