OweBucs usedonse iso lawase-Europe
Kuthiwa kunamakilabhu aseFrance amfunayo
ISENGCUPHENI yokulahlekelwa ngumdlali esanda kumthola i-Orlando Pirates njengoba kuvela ukuthi usehehe iso lamakilabhu ase-Europe.
IBucs ijabulise abalandeli bayo abebephuma kuzona zonke izinkalo iguqisa ngo-2-1 iLamontville Golden Arrows kowe-Absa Premiership ngoMgqibelo kusihlwa ePrincess Magogo Stadium, KwaMashu.
Amagoli okunqobe ngawo iBucs abekwe enethini ngoThembinkosi Lorch noMthokozisi Dube, kwathi elokubika ekhaya le-Arrows lashaywa nguJabulani “Mjafefe” Shongwe.
I-Arrows iqede lo mdlalo ingasaphelele kukhishwa ngekhadi elibomvu uLimbikani Mzava odlala emuva.
UMzava ukhishwe kungafanele kwazise unondweba akabonanga ukuthi umdlali obelimaze owePirates nguMzwandile “Gravel” Buthelezi kodwa wakhipha uMzava ngephutha.
Leli phephandaba lihletshelwe ngomunye umdlali weBucs ukuthi uJustin Shonga (21) waseZambia, osanda kusayiniswa yiBucs, ufunwa uthuli ngamakilabhu ase-Europe.
Kuthiwa ufunwa ngamakilabhu amabili aseFrance neyodwa yaseTurkey.
Leli phephandaba libuza lo mdlali ngalezi zindaba uthe: "Angeke ngikwazi ukuphawula ngalokho ngoba ongifunayo kufanele aqale akhulume nePirates ngoba nginenkontileka nayo.
"Kuyiphupho lami vele ukuthi ngigcine ngidlala e-Europe kodwa okwamanje ngisafuna ukuzakhela igama kwi-Absa Premiership.
"Ngifuna ukuhamba ezinyathelweni zabadlali abanjengoChris Katongo no-Isaac Chansa abazakhele igama kwiPremiership ngaphambi kokuya e-Europe.
Ngifuna ukunqoba izinkomishi nePirates. Yilokho engizokulwela okwamanje,” kusho uShonga.
Uthi ibajabulisile indlela abahlule ngayo i-Arrows.
“I-Arrows isinike umdlalo onzima, akubanga neze lula ukuyehlula.
"Kodwa sijabule ngamaphuzu amathathu esiwatholile abesifanele.
"Asiyibhekile kangako eyesicoco seligi sizimisele ukubhekana nomdlalo ngamunye sobona ekupheleni kwesizini ukuthi kwenzakalani,” kusho uShonga.