Ihlazo isalukazi (69) sinukubeza abazukulu
Bathi sesibalekile ekhaya
SINYANTISA igazi isenzo sesalukazi (69) saseThelizulu, eManguzi, esisolwa yindodakazi yaso ngokunukubeza ngokocansi siphindelela abazukulu baso, sibaphoqa ukuba basifake iminwe esithweni saso sangasese.
Namanje umndeni walezi zingane, ezingeke zidalulwe ngenhloso yokuzivikela, usashaqekile njengoba kuthiwa lesi salukazi ILANGA elinalo igama laso, sesibalekile.
Kubikwa ukuthi izingane zineminyaka eyisihlanu neyisi-9. Ngokuthola kweLANGA, lesi salukazi besithola ithuba lokugila lo mkhuba ngesikhathi sigada abazukulu baso kwazise indodakazi yaso ibingahlali nabo, isebenza KwaMsane, eMtubatuba.
Kuthiwa bese kuyimpilo yazo izingane ukuthokozisa uninakhulu ngokumfaka iminwe esithweni sangasese bese eziyalela ukuba zingayithi vu le ndaba.
Kuthiwa kuze kwatholakala ngokuthi eyodwa yezingane igile lo mhlola enganeni encane ngesikhathi zilele ndawonye, okuyilapho ibuzwe khona ukuthi ikwazelaphi ebikwenza.
Ekhuluma neLANGA unina walaba bafana, naye ongeke adalulwe ukuvikela izingane, uthe uqale ukusola ukuthi kukhona okushaya amanzi ngesikhathi evakashele kubo eManguzi, ebona izingane zithithibele.
Uthe ucabange ukuthi mhlawumbe zikhathazwa wukuthi uhlala kude nazo. Ube esethatha isinqumo sokuzilanda ziyohlala naye eMtubatuba lapho esebenza khona ngoba esola ukuthi kazikhululekile.
“Ngibe sengiqasha usisi othile ukuba azongigadela izingane zami ngoba mina ngiyasebenza. Lo sisi engimtholile unengane esencane yentombazane okuphoqe ukuba eze nayo sizohlala ndawonye.
“Kuthe silele ebusuku, indodana yami encane yafaka isandla sayo esithweni sangasese sengane yalo sisi obagadayo njengoba bebelala ndawonye nayo. Lo sisi ungazisile ngalokhu, ngayibuza ingane ukuthi iyithathaphi le nto eyenzayo.
“Iqale yakhala yabe isiyasho ukuthi ugogo ubejwayele ukubafundisa lokhu. Ngibe sengivusa lona omdala ngambuza ukuthi yini abebeyenza kugogo. Naye uvele wakhala ngaphambi kokuba angiphendule. Ungitshele ukuthi ugogo wabo bekuthi uma sekulalwa acime ikhandlela bese eguqa ngamadolo abatshele ukuba bamufake iminwe esithweni sakhe sangesese.
“Ngivele ngaphelelwa ngamandla ngoba bengimethemba kakhulu umama. Bengingacabangi ukuthi angenza into enjena ezinganeni zami. Ngosuku olulandelayo ngibiziwe esikoleni sezingane, uthisha wangibuza ukuthi kukhona yini okuziphazamisayo ekhaya ngoba ebona zingaqhubi kahle esikoleni, ikakhulukazi omdala. Ngibe sengimlandisa lonke udaba,” kusho yena.
Uthe esikoleni babe sebemxhumanisa nosonhlalakahle ukuba balekelele izingane ngoba bekubonakala ukuthi ziphazamisekile emqondweni. Uthe unina uphike walala ngomhlane ngesikhathi embuza.
“Sengiwazisile amalungu omndeni ngalolu daba. Sengilinde osonhlalakahle ngoba yibona abasebenza udaba lwezingane. Bangitshele ukuthi uma sebeqedile ukukhuluma nazo bazovula icala. Ibuhlungu into eyenziwe ngumama ezinganeni zami. Lona omdala yena uyabonakala ukuthi uphaza-misekile emqondweni,” kusho unina wezingane.
Okhulumela uMnyango we z o k u Thuthu k i s wa koMphakathi KwaZulu-Na t a l, uNkk Ncumisa Ndelu, uthe umnyango ubungakezwa ngalolu daba.
Uveze ukuthi uma udaba luselusha njengalolu kuthatha isikhathi ukuba lufike emnyangweni. Uthe njengoba osonhlalakahle bematasa nezingane, bazokuqinisekisa ukuthi uma sebeqedile umsolwa uyaboshwa, abhekane nengalo yomthetho.
“Akumele ukuhlukumeza sikubheke uma kwenziwa ngabesilisa kuphela. Kumele silwe nakho noma kwenziwa yibona abesifazane. Okubuhlungu wukuthi izingane kusolwa ukuthi bezihlukunyezwa ngumuntu obekumele ngabe uyazivikela. Nokho sizolulandelela ukubheka ukuthi umsolwa uyaboshwa,” uNkk Ndelu.
Okhulumela amaphoyisa KwaZulu-Natal, uCol Thembeka Mbhele, uthi umzali wengane bekumele aziyele mathupha emaphoyiseni ukuyovula icala, kuthathwe izitatimende ezinganeni nakuyena bese eboshwa umsolwa. Uthe bekungamele aqale ngokulinda osonhlalakahle.
“Umzali wengane kumele aye emaphoyiseni ayovula icala ngoba lokho ngeke kuwuphazamise umsebenzi wosonhlalakahle,” kusho uCol Mbhele.