Uqhosha ngesipiliyoni umqeqeshi weSundowns
Uwazwela ubuhlungu amakilabhu angakaqini ukhakhayi
UQHOSHA ngesipiliyoni sabadlali bakhe uPitso “Jingles” Mosimane ongumqeqeshi weMamelodi Sundowns ethishwa ukuhamba nesicoco seAbsa Premiership.
IDowns izotholana phezulu neChippa United kowe-Absa Premiership kusasa ngoLwesithathu ngo-19h30 eLoftus Stadium, ePretoria. AmaBrazilian aya kulo mdlalo nje, ahambela phezulu njengoba ngeSonto ntambama edlulele kwi- semi-final yeNedbank Cup eguqisa iCape Town City ngo-2-1 eCape Town Stadium.
IDowns iqhathwe neMaritzburg United kwi- semi-final.
UMosimane uthe ezakhe ziphethe isipiliyoni esingeke simelwe ngamakilabhu angaqinile ukhakhayi.
“Umdlalo wethu neCity ngikholwa wukuthi ukhombisile ukuthi sinesipiliyoni ekilabhini futhi esingeke simelwe yinoma ngubani. Sibhekene nobunzima njengoba sizogijima imidlalo eminingi esikhathini esifushane. Kodwa-ke siyijwayele le nto kuzosiza sona isipiliyoni sabadlali bami.
“Kufanele silwele ukugudluza iChippa njengamanje bese sibheka abezayo. Awuzukuba lula lo mdlalo kodwa asikwazi ukujikela emuva kufanele siwunqobe,” kusho uMosimane.
UVladislav Heric ocija iChi- ppa, uthe ezakhe zizoyiqhuzula iDowns.
“ISundowns iyizimfivilithi ukunqoba lo mdlalo ngenxa yokuthi inabadlali abaseqophelweni eliphezulu. Kodwake abantu bazobona ibhola elikhulu kabi ngoba sihlose ukuyiqhuzula.
Sizokwenza lokho uma ngibuka indlela abafana bami abagcwele ngayo ukuzethemba,” kusho uHeric.
Isiyonke imidlalo ye-Absa Premiership ehlelelwe ukugijinywa phakathi neviki iqhathwe kanje:NAMUHLA NGOLWESIBILI EKing Zwelithini Stadium: AmaZulu FC vs Ajax Cape Town 19h30 (SS4).
EBidvest Stadium: Bidvest Wits vs Maritzburg United 19h30.
KUSASA NGOLWESITHATHU
ERoyal Bafokeng Stadium: Platinum Stars vs Baroka FC 19h30.
E-Old Peter Mokaba Stadium: Polokwane City vs SuperSport United 19h30.
EGoble Park: Free State Stars vs Kaizer Chiefs 19h30 (SS5/ SS12).
ECape Town Stadium: Cape Town City vs Golden Arrows 19h30.
ELoftus Versfeld Stadium: Mamelodi Sundowns vs Chippa United 19h30 (SS9).
E-Orlando Stadium: Orlando Pirates vs Bloemfontein Celtic 19h30 (SS4).