INJABULO KWI-ARROWS NGABADLALI
KUBUYA abadlali abamqoka kwiLamontville Golden Arrows asebeqalile ukuziqeqesha nale kilabhu emuva kwesikhathi eside bengabonakali ngenxa yokulimala.
ILANGA lithole ukuthi uKudakwashe Mahachi noDanny Phiri baseZimbabwe sebeqalile ukuzivocavoca nabaBafana Bes’thende. Nokho laba badlali ngeke babonakale emdlalweni we-Arrows neCape Town City kwi-Absa Premiership ozokuba kusasa ngoLwesithathu ngo-19h30 eCape Town Stadium.
Izindaba zokuqala ukujima kwalaba badlali ziqinisekiswe nguClinton Larsen ocija i-Arrows, otshele ILANGA izolo ngoMsombuluko ukuthi usidinga kakhulu isipiliyoni salaba badlali nokho abangakabi qatha ngokwanele ukuthi usengabaqalisa imidlalo.
“Ukululama kwalaba badlali kuyizindaba ezinhle kakhulu ekilabhini njengoba sekubhekwe ekusongweni kwesizini.
" Ngicabanga ukuthi isipiliyoni sabo sizosidinga kakhulu emidlalweni ezayo. Sisalwela ukuqeda isizini sibalwa namakilabhu angaphakathi kwi-top 8.
“Uma singakwazi ukuqoqa amaphuzu agcwele kwiCape Town City lokho kungenza umehluko omkhulu ekilabhini.
Inhloso yethu enkulu njengamanje wukusuka siphele eduze kwezembe esizithole sesisemngceleni walo ngenxa yokungawasebenzisi ngendlela amathuba.
“Kule sizini sihlangabezane nembibizane silinyalelwa ngabadlali abamqoka njengoba uPhiri agijima imidlalo eyisihlanu nje kuphela wabe eselimala kanti