Uzibulale ngesibhamu sentombi eyiphoyisa
Intombi ibilotsholwa yisikhulu sikamasipala
USOLA idliso unina wowesilisa ozingqokoze ngesibhamu sentombi yakhe eyingoduso yesikhulu esisebenza kuMasipala weTheku.
Uhluleka nokuzibamba izinyembezi uNkz Sibongile Ngubane (72), waseMayville, eThekwini, uma echaza ngokushona kwendodana yakhe enguMnu Njabulo Mpungose (38) ezidubule yazibulala ngesibhamu sentombi yayo eyiphoyisa eDurban Central, eThekwini, ngoLwesibili emini.
UNkz Ngubane utshele ILANGA ukuthi unezinsolo eziqinile zokuthi indodana yakhe ibidlisiwe ngendlela ebiyenza ngayo. Uthi ibingasadli, ingasalubhadi emsebenzini, ingasenandaba ngisho nanezingane zayo, ibalisa ngentombi yayo nje kuphela - yize isilotsholwe ngomunye umuntu.
Utshele leli phephandaba ukuthi indodana yakhe izibulala nje, unina wezingane zayo uzithwele. UNkz Ngubane obekhuluma naleli phephandaba esemakhandleni, uthi indodana yakhe selokhu ithole ukuthi intombi yayo yeminyaka, enguConst (32), isilotsholwa ngomunye umuntu, impilo yayo ishintshile. ILANGA linqume ukuligodla igama le ntombi
“Indaba iqale ngokuthi uNjabulo athole ukuthi intombi yakhe isinelinye isoka, wayicela ukuba bahlukane ukuze izoqhubeka nesoka layo elisha.
“Intombazane iqale yanqaba ukuba bahlukane, yamncenga waze wagcina esevumile ukuthi baqhubeke. Kuthe ekuqaleni kwalo nyaka wathola izindaba zokuthi ilotsholwa ngowesilisa osebenza kwamasipala,” kusho uNkz Ngubane.
Uthi indodana yakhe ibihlale imbikela ukuthi kabusehli ubu- thongo ebusuku, ihlale icabanga intombi yayo, isifuna nokuzibulala, iyehluleka wukumelana nokuthi intombi isilotsholwa ngomunye umuntu.
Uqhuba uthi ize yayofuna amaphilisi kudokotela azoyisiza ukuba ikwazi ukulala. Utshele ILANGA ukuthi ngoLwesihlanu olwedlule ufonelwe yindodana yakhe imtshela ukuthi imthanda kangakanani, yaxolisa nangesinqumo ezosithatha sokuzibulala qede yavala ucingo.
“Ngisuke ngaleso sikhathi ngaqasha imoto ngiphuthuma efulethini layo edolobheni nebala sayifica iphethe isibhamu izama ukuzibulala. Ngikhulume nayo yangilalela, isibhamu sayo sagcina sibuyele naso ekhaya.
“NgoMgqibelo ngivukele etohweni lami. Ngithole ucingo emini ngisemsebenzini kuthiwa uNjabulo usephuze inqwaba yamaphilisi, uzama ukuzibulala,” kusho yena.
Uthi ngokubona ukuthi indodana yakhe bekubonakala sengathi kukhona edliswe khona, uni- kele kwenye yezindawo ezidayisa imithi yesintu yokukhipha idliso.
NgoMsumbuluko ntambama, ufonele indodana yakhe wayazisa ukuthi kunomuthi ayithengele wona afuna ukuthi iwuphuze, uzoyisiza kule nkinga ebhekene nayo.
“UNjabulo ufike ngoLwesibili ekuseni ekhaya emuhle egqoke kahle, ebukeka sengathi useyasamukela isimo sokuhlukana nentombi yakhe, wangitshela ukuthi usenqume ukubuya azohlala lapha ekhaya.
“Uze wangitshela ukuthi ufuna ukulungisa igumbi elizohlala izimpahla zakhe azobuya nazo efulethini.
“Ufike ngiqeda kumbilisela umuthi wakhe ngisawupholisa. Uqale wacela ukudla ekhala ngendlala, waziphakela qede wazohlala nami embhedeni ekamelweni lami.
“Uqede ukudla wathi usaphu- thuma esibhedlela uyolanda incwadi obekumele ayihambise emsebenzini njengoba bese kunezinsuku engayi. Uphume ekhaya engithembise ukuthi umuthi uzowuphuza uma esebuya esibhedlela.
“Ngithuke kwaphela nasozwaneni emini ngithola ucingo sifonelwa yintombi yakhe isazisa ukuthi uNjabulo usefulethini layo uzama ukuyibulala.
“Siphuthume khona safika sekugcwele amaphoyisa uNjabulo ezivalele ngaphakathi efulethini lentombi ephethe isibhamu sayo somsebenzi.
“Ngicele amaphoyisa ukuthi angidlulise ngiyomncenga ukuthi angazibulali, ngadonsa ukhiye obuphansi ngavula isango ebelikhiyiwe ngibe sengikhuluma naye ngimncenga ukuba angazibulali.
“Ngiqede ukuvula isango ngezwa kuqhuma isibhamu ezidubula. Singene endlini yentombazane esezidubulile emlonyeni eseshonile,” kusho kuyena.
ILANGA lishayele intombi kaMnu Mpungose ukuzwa uvo lwayo ngalolu daba, inele yezwa ukuthi ikhuluma nentatheli yavala ucingo. Iphinda yafonelwa, kodwa ucingo bese lukhala lodwa lungabanjwa.
Okhulumela amaphoyisa KwaZulu-Natal, uCol Thembeka Mbhele, uthe amaphoyisa aseqale uphenyo ngokushona kukaMnu Mpungose.