USOVALWENI USOMABHIZINISI NGOKUTHUNJWA KOMNDENI
UDLIWA yingebhe umndeni kasomabhizinisi owaziwayo eMtubatuba, ogwini olusenyakatho yeKwaZulu-Natal, uMnu Vusi Bhengu ( osesithombeni), ngemuva kokuthunjwa komndeni wakhe yizigebengu eziyisi-8 zahlala nawo ehlathini elikuyona le ndawo zaze zawudedela ezintathakusa ngesonto eledlule.
Ngokuthola kweLANGA, umndeni kaMnu Bhengu usathuka izanya njengoba naye ethi akazi ukuthi yini lena engaka ayonile ukuthi sekungaze kuthunjwe umndeni wakhe uyoshiywa ehlathini.
Elandisa leli phephandaba, uthi kuqale ngokugqekezwa komuzi wakhe mhla zingama-25 ngenyanga edlule, kwathathwa umabonakude nekhompyutha. Ngaleso sikhathi bekungekho muntu.
“Intombazane esizayo beyigodukile kungekho muntu ekhaya. Ngifike ngabikelwa ngalokhu ngayovula icala emaphoyiseni,” kusho yena. Ngenxa yokuthi unovalo lokuthi izigebengu zingase zibuye, uthi ubeke unogada esangweni ukuba agade izinsukwana.
NgoLwesine uthi ubengekho kwakhe, ehambe ngokwebhizinisi, okuyilapho kuhlasele izigebengu ezibalelwa esi-8 zathatha imoto yakhe eyiRange Rover Evogue, zahlohla umndeni wakhe kuyona nonogada ngemuva kokumshaya kanzima.
“Bafike kukhona unogada walwa nabo ezitshela ukuthi ngabantu ababili kanti bayisi-8. Bamshaye bamlimaza kanzima bambopha ngozankosi, bamfaka emotweni.
“Bathumbe inkosikazi yami, ingane eneminyaka eyisihlanu nezimbili ebezivakashile eneminyaka engama-22 neli-15. Kabazange babalimaze kodwa abanye bahambe nabo, abanye basala emzini wami ngoba bethi balinde mina,” kusho uMnu Bhengu.
Uthi ngesikhathi lezi zigebengu ezine zihamba nomndeni wakhe ziyowubeka ehlathini, bezikhuluma nawo ziwutshela ukuthi ngeke ziwulimaze ngoba kazifuni wona futhi zona zithunyiwe. Uthi amaholide ePhasika uwadle kabi nomndeni wakhe bengakhululekile ngoba akakwazi nokubaleka kwazise akazi ukuthi ubalekela bani nokuthi wenzeni kubani.
“Ukube ukhona umuntu engaziyo ukuthi ngixabene naye ngabe ngiyabaleka noma ukube kukhona ongitshelayo uma ngimnyathele amakhona, ngabe ngiyazi ukuthi kukhona engimonile. Manje kangazi ukuthi ngubani lona ongifunayo nokuthi ngimenzeni, ngakho-ke nokubaleka kunzima ngoba ngizobaleka ngiye kuphi,” kusho yena ezwakala ukuthi ukhathazekile.
Uthi usizwe ngusomabhizinisi wasendaweni onenkampani yonogada ukuyolanda umndeni wakhe lapho ubukhona okuthe uma befika kwabe kufika namaphoyisa.
Utshele leli phephandaba ukuthi abesiqophamkhondo ( tracker), bamtshele ukuthi imoto bayithola eMozambique.
“Kangazi-ke noma bebevele befuna imoto noma bebefuna mina, kodwa engikubongayo wukuthi kabawulimazanga umndeni wami,” kusho yena.
Okhulumela amaphoyisa KwaZulu-Natal, uCol Thembeka Mbhele, usiqinisekisile lesi sigameko. “Kuvulwe amacala amabili ngalesi sigameko, okungelokuthumba nelokudunwa kwemoto. Amaphoyisa asaphenya,”kusho uColonel Mbhele.