UMHLENGI UPHINDE WAHLENGA USUTHU
Uphinde wahlenga uSuthu uMhlengi
UPHINDE waba yiqhawe lamaZulu FC uMhlengi “Mgijimi” Cele eshaya igoli elenze uSuthu lwabuya nephuzu elimqoka seliyozilahla kunina lubambana neBloemfontein Celtic ngo-1-1 kowe-Absa Premiership izolo ngeSonto ntambama eDr Molemela Stadium, eFree State.
UCele uhlohle igoli ngomzuzu wama-87 ebulala elikaJacky Motshekgwa alibhakuzise ngowama-82. Womabili la makilabhu alwela ukuqeda isizini ekwi- top 8 ukuze adlale iMTN8.
UCele usanda kuba yiqhawe loSuthu ehlohla igoli lokunqoba kuba ngu-2-1 lubhekene ne-Ajax Cape Town eMlazi ngeledlule.
Ngesikhathi uSuthu lugadulisana neCeltic, iMamelodi Sundowns ibivula igebe esicongweni se-Absa Premiership emuva kokuguqisa iBaroka FC ngo-2-1 izolo ePeter Mokaba Stadium. IBaroka yiyona ebone kuqala amapali lapho egxunyekwe ngakhona ngesikhathi uLucky Nguzana eshaya igoli ngomzuzu wama-20. AweSundowns ashaywe nguWayne Arendse ngomzuzu wama-43 noPercy Tau ngowama-50.
ISundowns isivule igebe lama- phuzu amane kwi-Orlando Pirates ehleli endaweni yesibili. La makilabhu okubukeka esesele womabili embangweni wesicoco seligi, asalelwe yimidlalo eyisihlanu ukusonga isizini. IBaroka iwuqale kabi lo mdlalo kulimala isethenjwa sayo, uTalent Chawaphiwa ngomzuzu we-12 okuyiphoqe ukufaka uRobert Ngalande.
Emuva kwalo mdlalo uPitso Mosimane ocija iDowns uncome isipiliyoni kwezakhe. Uncome uSibusiso Vilakazi ngobuchule abusebenzisile ukwakha la magoli. UVilakazi uqokwe njengomdlali ovelele. Isiyonke imiphumela ye-Absa Premiership: Celtic 1, AmaZulu FC 1; Baroka FC 1, Sundowns 2; PMB United 1, Cape Town City 1; Platinum Stars 2, Polokwane City 0; Kaizer Chiefs 0, Chippa United 3; Golden Arrows 1, Free State Stars 1.
Eye-English Premiership: Chelsea 1, West Ham 1; Arsenal 3, Southampton 2; Man City 2, Man United 3; Watford 1, Burnley 2; Brighton 1, Huddersfield 1; Bournemouth 2, Palace 2; Leicester 1, Newcastle 2; West Brom 1, Swansea 1; Stoke 1, Tottenham 2; Everton 0, Liverpool 0.
EyeSuper Rugby: Jaguares 14, Crusaders 40; Lions 52, Stormers 31; Brumbies 45,Reds 21; Chiefs 21, Blues 19; Sunwolves 29, Waratahs 50; Hurricanes 38, Sharks 37.