I-DA isole izimbangi ngoqhekeko
Ithi zisebenzisa ubuhlanga ukuhlukanisa izwe
ISOLE izimbangi zayo [i-African National Congress - (ANC) ne-Economic Freedom Fighters - (EFF)] ngokucasha ngezithupha uma iphoselwa inselelo ngokuqhekeza iNingizimu Afrika isebenzisa ubuhlanga, iDemocratic Alliance (DA) ngesikhathi ivala ingqungquthela yayo yokukhetha ubuholi ebiseTshwane Events Centre, ePretoria izolo ngeSonto.
Ethula inkulumo yakhe yokuvala umholi weDA, uMnu Mmusi Maimane - okhethwe ngo-elethu ukuqhubeka kulesi sikhundla iminyaka emithathu - uthe kunamaqembu asabambelele emaqhingeni asemandulo, asephelelwe wushatini (ukunqoba izinhliziyo zabavoti) kodwa iqembu lakhe lizogadla ngamasu azoyisa elakuleli phambili.
Kalusalanga udaba lomhlaba olusematheni njengoba ethe kumele bonke abantu babe nezindlu ezinesithunzi kodwa lokho kakusho ukuthi “kumele kuchitshiyelwe umthethosisekelo wethu omuhle kangaka ukuze lokho kwenzeke”.
Ubephawula mayelana neziphakamiso zokuba kuvivinywe isigatshana sama-25 somthethosisekelo esikhuluma ngobunikazi bomhlaba.
“Abantu abahlala emadolobheni aphethwe yiDA bazoba namatayitela obunikazi bemizi yabo. Kungijabulise kakhulu ukuzwa umhlobo wami waseWestern Cape, uMnu Bonginkosi Madikizela (onguNgqongqoshe wezokuHlaliswa kwaBantu) ethi usekhiphe amatayitela ayizi-91 000 wawanika abanikazi bawo.
“Bonke abantu kumele babe nemizi enesithunzi, babe nelungelo lomhlaba. Kumele siqede inkohlakalo, izinto zenziwe ngendlela efanele. Emigomeni yethu sinqume ukuba sibhekane nazo zonke izinkinga ezibhekene nezempilo kuleli ngokuba sakhe imitholampilo, ikakhulukazi emiphakathi- ni engenayo, sibuyise namakolishi amanesi,” kusho uMnu Maimane.
Uthe bazimisele ngokuqinisekisa umsebenzi wokuba yizinjini zokukhula komnotho wakuleli.
Ugqugquzele ubuholi obukhethiwe, okunguSihlalo, uMnu Athol Trollip namasekela akhe, uMnu Ivan Meyer, uMnu Mike Waters uNkz Refiloe Ntsekhe nomgcinimafa, uMnu Dion George, ukuba basebenze ngokuzikhandla ukuqinisekisa ukuthi iDA igila izimanga okhethweni lukazwelonke ngowezi-2019.
UMnu Trollip uguqise uMnu Solly Msimango (oyiMeya yaseTshwane) kwesikasihlalo.
UMnu Maimane uzwakalise ukweseka kakhulu uMnu Trollip obuye abe yiMeya yaseNelson Mandela Bay, e-Eastern Cape, ojijinyezwa ngejozi yi-EFF njengoba ifuna ashaywe ngevoti lokungamethembi.
Umhlangano wokushaya uMnu Trollip ngevoti lokungamethembi ukusasa ngoLwesibili emuva kokuba obekumele ube mhla zingama29 kuNdasa ( March) ubhuntshile ngenxa yezinxushuxnushiu phakathi kwamaqembu ezepolitiki.
Owakusasa umhlangano usufaka kuleli voti nokungabethembi ubuholi bukasomlomo, uMnu Jonathan Lowack nesigungu esiphezulu samakhansela.