UBEYIQHATHANZIPHO U-WINNIE
BEKUNGAGCINI nje ngoMnu Nelson Mandela ukugqama ngemfashini eyehlukile emndenini wakhe - njengoba ebedume ngamahembe angawudingi uthayi - noNkk Winnie Madikizela-Mandela (oke waba ngumkakhe), ubeyidla indwangu.
ILANGA lixoxe noMnu Mthokozisi “Swenka‚” Chiya ongungoti wezemfashini, obezwakala ohlelweni lwasekuseni oKhozini FM ngazo ezithinta lesi sihloko.
Uthi uNkk MadikizelaMandela ubeyintandokazi kwezemfashini, ikakhulukazi kwabesifazane.
Uqhube wathi lokhu kakupheleli nje kokokwembatha kodwa nendlela owesifazane oshadile noma ongashadile aba yiyona, okugqame kakhulu kuNkk Madikizela-Mandela ngesikhathi umyeni wakhe engekho, esegwetshwe udilikajele.
Uthe ngayo imfashini ubakhululile abesifazane emqondweni njengoba ekwazile ukubonakala ethe shi kwezomzabalazo kodwa engayekile ukubukeka engowesifazane ozithandayo ngisho kusemgwaqweni noma ezinkundleni nasemaralini epolitiki.
UMnu Chiya wenze isibonelo sezinsuku ze-United Democratic Front (UDF) lapho uNkk Madikizela-Mandela ebezigqoka izingubo ezinombala owukhakhi - obuweyamaniswa nabalimi besizwe samaBhunu - kodwa awushebe nemibala yeqembu lakhe (i-ANC).
Kwezokwembatha ubeqikelela ngisho nezibuko, okungaba ngezikadokotela noma ezelanga - ubengaveli ngezibuko ezineframe efanayo njalo.
Ezakhe bezihambisana nokugqokela kwakhe umcimbi asuke ewuhambele. Nangesi- khathi kugqekezwa emzini wakhe kuyezwakala ukuthi amasela aphuthuma bona ubucwebe bakhe.
Enjalo nje, kuthiwa ukuziphophotha ubengaquleli idosha lonke ebusweni noma azibhixe kube yihaba, kodwa ubekwenza ngendlela efanele.
Nezinhlobo zamawig akhe bezihambisana nendlela agqoke ngayo.
Isibonelo, njengamhla esemcimbini wokuhalalisela uDkt Mbuyiseni Ndlozi weEconomic Freedom Fighters (EFF) ethola iziqu zobudokotela. “Ngeke isale ngaphandle eyomshuqulo ebonakele nakosaziwayo beyifakile kulezi zinsuku zokumhlonipha kangangoba ngisho nabanye besilisa, njengo-Arthur Mafokate, nabo bamhloniphe ngawo umshuqulo.
Nokusebenzisa umbala omnyama kubonakele kosaziwayo besifazane abaningi ngalezi zinsuku zokumhlonipha.
Igalelo lakhe kwezemfashini belihambisana nokuthi ubengumuntu ozithandayo, oyikhathalele indlela abukeka ngayo emphakathini, kwaze kwaba sekugcineni‚” kuphetha uMnu Chiya.