INGEBHE KUBULAWA IKHEHLA
UVALO emalungwini omphakathi waseMbumbulu, eThekwini emuva kokubulawa ngesihluku owesilisa osekhulile elele emzini wakhe ngoLwesihlanu.
UMnu Beka Mkhize (81) - obehlala yedwa emzini wakhe - ungenelwe ngabantu abangaziwa bamngenela ngesibhaxu waze washona qede bathatha umakhalekhukhwini wakhe bashaya bachitha nawo.
Ngokuthola kwaleli phephandaba ngelungu lomphakathi elicele ukuba siligodle igama lalo ukulivikela, uMnu Ngcobo kakukho lutho abamazela lona olungalungile njengoba ebulawe ngesihluku esingaka.
Lithi ubekhonze ukuhlala ngaphansi kwesihlahla athamele umthunzi, ubengeyena umuntu ozulayo.
“Kusishayisa ngovalo singomakhelwane bakhe, sizibona singaphephile uma abantu bekwazi ukungenela umuntu omdala kangaka bambulale.
“Siyasola ukuthi abantu abenze lokhu bebefuna nemali yakhe yempesheni njengoba abantu abadala besanda kuhola,” kusho leli lungu lomphakathi.
Lithi lokhu okwehlele uMnu Mkhize yinto engajwayelekile endaweni yabo ukuthi kuhlaselwe umuntu abulawe emzini wakhe.
“Le nto eyehlele uMkhize sihlale siyibukela le kude kunathi, kusethusile ukuthi yenzeke endaweni yethu.
“Sizosebenza ngokubambisana namaphoyisa ukuba kubanjwe lezi zigilamkhuba ezibulale ikhehla elingenacala,” kuphetha leli lungu lomphakathi.
Okhulumela amaphoyisa KwaZulu-Natal, uCapt Nqobile Gwala, usiqinisekisile lesi sigameko wathi amaphoyisa aseMbumbulu athole umbiko ngesidumbu sowesilisa osekhulile sinezingozi zokushaywa.
Uthi amaphoyisa asevule amacala amabili, elokweba nelokubulala. Bekungakaboshwa muntu okwamanje kodwa amaphoyisa ayaqhubeka nokwenza uphenyo.