Isihluku kugencwa kubulawa isalukazi phambi kwengane
Bathe bafuna indodana ikhiphe imali
USETHUKA izanya - umndeni wakwaBiyela KwaHlomendlini, eMandeni, KwaZuluNatal ongenelwe yizigebengu zagenca zabulala isalukazi sakhona phambi kwengane maqede zagenca, zadubula indodana yaso.
Lesi sigameko esenzeke ngeledlule, sishiye lo mndeni nomphakathi wonke wethukile ngenxa yokwanda kwezigameko zokubulawa kwabantu kule ndawo.
Ngokuthola kweLANGA, uNkz Ntombi Biyela (66), ugencwe umzimba wonke - wagcina eshonele esibhedlela - yizigebengu ebeziyofuna uMnu Phakamani Mhlongo (31) oyindodana yakhe okuthiwa inebhizinisi lokubolekisa ngemali edolobheni eMandeni.
Abasolwa kuthiwa bebehlose ukuqotha wonke umndeni kodwa behluleka njengoba amanye amalungu awo ebalekile ayofuna usizo komakhelwane.
Lesi sigameko sisukumise amalungu omphakathi kangangoba ngoLwesihlanu amashele esiteshini samaphoyisa iNewark ehambisa uhlu lwezikhalo zawo njengoba kuthiwa izigebengu zizenzela umathanda kule ndawo.
ILANGA lihambele lo mndeni ngoLwesihlanu, lifike kubonakala ukuthi isimo sisemuncu emuva kwalesi sigameko - yize umufi esefihliwe. Ekhuluma naleli phephandaba uMnu Mhlongo, ubebonakala ukuthi usatubekile emzimbeni njengoba izigebengu ziqale kuyena zamgenca ekhanda maqede zamdubula ngaphambi kokudlulela kunina.
“Ngizwe kukhonkotha izinja entathakusa, kuthe uma ngilunguza ngewindi ngabona abantu behamba egcekeni. Ngithe ngisethuswe yilokho, ngezwa sebekhahlela isicabha bememeza bethi mangivule.
“Ngicuthile ngoba ibingekho enye indlela yokubaleka. Bathe bengena endlini ngaphambana nabo kodwa bangibamba omunye wabo wangigenca ngembazo ekhanda ngawa. Ngithe ngizama ukubaleka wangidubula lona obephethe isibhamu, inhlamvu yangena ngemuva yaphuma esifubeni.
“Sengiphansi, uqhubekile nokungidubula ngashayeka ethangeni. Bebelokhu bengibuza ukuthi iphi imali engiyifihle endlini mangiyikhiphe ngoba bayazi ngibolekisa ngemali.
“Bathe bebona ukuthi kangisanyakazi, ba-khuphukela endlini enkulu lapho umama ebememeza khona ecela usizo komakhelwane ngoba ezwa kuqhuma isibhamu.
“Kuphele isikhashana bengenile endlini ngezwa esethule (umama), engicabanga ukuthi besebemgencile.
“Ngizamile ukukhasa ngifuna ukweqa uthango kodwa lona obephethe imbazo wangibona wabuyela kimina. Ufike wabuza ukuthi kangikafi, wangiphinda ngembazo ngawela ngenzansi kothango.
“Ngiyacabanga ukuthi ubezitshela ukuthi ngifile ngoba akangilandelanga. Ngaleso sikhathi omakhelwane bazamile ukuzobheka ukuthi kwenzekani kodwa izigengu bezivele zidubule zibhekise kubona babaleke. Baqede lapho bazama ukuthatha imoto babulala nophahla lwendlu befuna imali,” kusho uMnu Mhlongo.
Uthi namanje akakholwa ukuthi usindile. Uthi isimo sinzima kanti banovalo lokuthi lezi zigebengu zingase zibuye.
“Kabaqali ukungihlasela ngoba nangoZibandlela (December) bangingenele endlini bafuna imali. Kulokho ngikwazile ukuphunyuka ngibaleke bengangilimazanga.
“Kuyacaca ukuthi abantu abenze lokhu bayazi ukuthi ngiyazizamela njengoba nginehhovisi lapho ngibolekisa khona ngemali eMandeni. Lokhu ngikusho ngoba bafike bafuna imali bathi mangiyikhiphe yonke.
“Ibuhlungu into abeyenze kimina bebulala umama ngesihluku phambi kwengane encane,” kusho yena.
UColonel Thembeka Mbhele okhulumela amaphoyisa KwaZuluNatal, uthi kuvulwe amacala amathathu; elokubamba inkunzi, elokubulala nelokuzama ukubulala. Bekungakaboshwa muntu.