Basola ugesi ngokusha komndeni
Bazunywe wubuthongo belayithe ikhandlela
ASOLA ukuhamba kukagesi amalungu omndeni wakwaJayiya eNhlungwane eNanda, eThekwini emuva kokushona kwendodakazi yawo nezingane zayo ezimbili nesoka abashe babawumlotha ngoLwesihlanu ebusuku.
Kusolwa ukuthi lo mndeni uzunywe wubuthongo ulayithe ikhandlela ngesikhathi kuphele ugesi. Kunzima ngisho ukuchaza emalungwini omndeni ngento abayibonile indodakazi yabo nezingane zayo ezimbili besha baze baba wumlotha ehluleka wukubasiza ngenxa yekloba lomlilo kanti nendlu ibikhiyiwe.
ILANGA lithole ukuthi uNombulelo Jayiya (33) nesoka lakhe elinguMnu Xolani Mbatha - ebelivakashile - u-Abongile Jayiya (9) noLubabalo Jayiya (8) behlelwe yilo mshophi ngoLwesihlanu ebusuku belele.
UNkz Simphiwe Dlamini, ongumakhelwane - obekhona ngesikhathi kwenzeka lesi sigameko - uthi namanje kusenzima ukukholwa yinto ayibonile.
“Siphelelwe wugesi ngoLwesihlanu ngezithuba zehora lesihlanu ntambama singakaqedi ngisho ukupheka.
“Ngisheshe ngalala ngoba bekumnyama sibona kuze kuhamba isikhathi ugesi ungabuyi. Bese ngizumekile ngezithuba zehora le-11 ebusuku ngiphaphanyiswa wumsindo wengane le yomfana ikhala icela usizo.
“Bengizitshela ukuthi bangenelwe yizigebengu zibabamba inkunzi. Ngilunguze ngewindi ngiqalaza ukuthi kwenzenjani ingane yakhala kangaka, ngahlangatshezwa wumlilo obusuvutha ubuhanguhangu uphuma ngophahla lwendlu," kusho uNkz Dlamini.
Uthi uvuse abelele nabo endlini ukuba baphume bayosiza umakhelwane wabo. Bafike ingane yomfana ikhala ime ngasemnyango ifuna usizo, bazama ukugqekeza umnyango kodwa behluleka ngenxa yokuthi amalangabi abesemakhulu kakhulu nomnyango ubukhiyiwe.
“Ingane ikhale yaze yathula sihluleka wukuyisiza,” kusho uNkz Dlamini.
UNkz Duduzile Cele, onguyisekazi kaNkz Jayiya, ukhale ngokuthi isimo sinzima njengoba kushone indodakazi yakhe nabazukulu, ka-bazi ukuthi bazothathani bahla-nganise nani njengoba kungasebe-nzi muntu ekhaya.
“Siyacela noma yimuphi umSamariya ukuba asisize ngo- xhaso ukuze kungcwabeke indodakazi nabazukulu bami. Indodakazi ibiziphilisa ngokubamba amatoho,” kusho yena.
USamkelisiwe Jayiya (18) oyindodakazi endala kamufi naye ohlala nabo kodwa obengekho ngesikhathi kwenzeka lokhu, uthi ubonga uNkulunkulu ngoba naye ngabe kukhulunywa ukuthi ushonile ukube ubekhona endlini.
“Ngihambe ekhaya ntambama ugesi usuhambile ngiyovakashela isihlobo sami ngizobuya ekhaya ngakusasa.
“Kumanje ngisele nalokhu engikugqokile kuphela, izimpahla zami zishe zonke ngisho nezesikole, kanginayo ngisho indawo yokuhlala, sengiqube ezihlotsheni,” kusho yena.
Lo mndeni ucela ukusizwa ngezindleko zomngcwabo. Uthe nanoma yiluphi usizo ongaluthola uyolwamukela njengoba izingane ezisele zingenazo ngisho izimpahla zokugqoka.
Okhulumela amaphoyisa KwaZulu-Natal, uCapt Nqobile Gwala, uthe kuvulwe idokodo ngokushona kwalaba, amaphoyisa aseqale uphenyo.