UMSINDO NGOKUQASHWA KWAMALUNGU OMKHONTO
AYAVUTHA amaqembu ezepolitiki asola uMasipala weTheku ngokuxhaphaza imali yabakhokhi bentela njengoba ethi lo masipala wenza izinto ngaphandle kokulandela imigudu efanele.
Akusho lokhu ngoba ephikisana nokuqashwa isigubhukane kwamalungu oMkhonto weSizwe Military Veterans Association (MKMVA), athi kwenzeke ngaphandle kokulandelwa kwenqubomgomo yokuqashwa kwabantu.
USihlalo weNkatha Freedom Party (IFP), uMnu Blessed Gwala, uthi lokhu okwenziwe wuMasipala weTheku kuyitulo lokudla bume imali yabakhokhi bentela, ukwenza lokhu nje uvikelwa wuHulumeni KwaZulu-Natal.
Uthi le mali yokukhokhela lezi zisebenzi kuyacaca ukuthi izoncuzulwa kwezinye izindawo bese kucashwa ngokuthi kuzokhokhelwa zona kanti sekuyindlela yokudla imali.
“Kwezinye izindawo uma lezi zinto zenziwa wumasipala ongaphethwe yiANC, uhulumeni kawusichithi isikhathi, uvele uwuphuce amandla. UMasipala weTheku, uMgungundlovu, uMnambithi neNewcastle benza into abayithandayo ngesikhathi abasithandayo,” kusho uMnu Gwala.
UMnu Zwakele Mncwango weDemocratic Alliance (DA) KwaZuluNatal uthi uMasipala weTheku usukwenze kwacaca ukuthi uma ufuna umsebenzi kumele abantu benze ubudlova.
“UMasipala weTheku uzifake kwenkulu ingcindezi ngoba kusengavuka amanye amasosha ayesemzabalazweni okungesiwona awe-ANC nawo eyofuna ngenkani umsebenzi. Wonke umuntu unelungelo lokuthola umsebenzi kodwa esilwa nakho wukuthi kungalandelwa imigudu efanele.
“IMeya yeTheku kumele izinuke amakhwapha, kodwa-ke kuyoziqaqa okwazibophayo ngoba sisazofuna izimpendulo ngale nto eyenzekile. KuMasipala weTheku abantu bavele bakhombe yonke into abayifunayo njengoba namadelangokubona ekwenzile lokhu kumathenda nakhona avunyelwa,” kusho uMnu Mncwango.
Kwenzeka lokhu nje, abantu abali100 abazibiza ngeMKMVA begasele emahhovisi kaMasipala weTheku ngoLwesibili olwedlule bafuna ukunikezwa imisebenzi ngenkani ngaphandle kokuba bafake izicelo ngokusemthethweni.
IMeya yeTheku, uNkk Zandile Gumede, kuthiwa kayizange ichithe sikhathi kodwa iyalele umnyango wezokuqa-shwa kwezisebenzi ukuba la malu-ngu anikezwe umsebenzi. Kuqashwe abalinganiselwa ema-80.
IMenenja yeTheku, uMnu Sipho Nzuza, iphawulile kwelinye lamaphepha esilungu ukuthi amalungu ali-15 eMKMVA azoqala ukusebenza namhlanje aqashwe ngokugcwele, azosebenza ngaphansi komnyango wazemanzi nokukhucululwa kwendle, angama-36 azoqala ukusebenza ngoNhlaba (May) ngaphansi komnyango wezokulungiswa kwemigwaqo nezikhukhula kanti angama-30 azosebenza emapaki.
Uveze nokuthi lokhu kuhambiselana nokuthi ngokomthetho obhekelele aboMkhonto Wesizwe uthi omasipala, iminyango kahulumeni kumele babaxhase ngemisebenzi.
Uthi bazonxenxa neminye iminyango kahulumeni ukuba isondele eduze kwesekwe amasosha eMK ngoba uMasipala weTheku kawunawo amathuba emisebenzi anele ukuze baqashwe bonke.
UMnu Mthunzi Gumede okhulumela iMeya yeTheku, uthe umasipala wazibophezela ekwenzeni ihhovisi elizobhekelela omakadebona kwezokulelwa umzabalazo.