AWUJABULE UMNDENI NGEBHEYILI KOBULALE UMSOLWA
UDEDELWE ngebheyili ka-R 3 000 ngoLwesihlanu yiNkantolo yeMantshi yaseNgwelezane uSihlalo wamaMetered Taxi waseMpangeni, osolwa ngokudubula abulale iphoyisa emzini walo ngoNcwaba (August) nyakenye.
UMnu Siboniso Ngcobo ubhekene necala lokubulala uConstable Musa Mdlalose (31), obesebenza ophikweni lwePublic Order Policing esiteshini saseMpangeni.
Umndeni kaConst Mdlalose ubhodla umlilo ngesinqumo senkantolo sokudedela uMnu Ngcobo ngebheyili.
Uyise omncane kamufi, uMnu Bongani Mdlalose, utshele ILANGA ukuthi: “Izinhliziyo zethu zibuhlungu ngokuphuma kukaSiboniso ngebheyili ngoba usethole ilungelo lokuchanasa ngaphandle kodwa ingane kamfowethu ilele kobandayo.
“Kusobala ukuthi umthetho kawunandaba nezinhlungu esizizwayo njengoba silahlekelwe. Kuvele kwavuka izilonda zokushona kwakhe (uConst Mdlalose) ngesikhathi inkantolo inikeza umsolwa ibheyili ka-R3 000.
“Besinethemba lokuthi ngeke ayinikwe njengoba esolwa ngokubulala iphoyisa. Besithi uzotoka kuze kufike usuku lapho inkantolo izikhipha khona isinqumo sayo. Umuntu ophume ngemali encane kangaka ngumuntu ontshontshile, hhayi obulele. Umoya wami kawujabulile, ngiphatheke kabi kakhulu,” kusho uMnu Mdlalose.
UConst Mdlalose kuthiwa udutshulwe emzini wakhe evulela umkakhe isango engena kwakhe ngemoto yomsebenzi.
ILANGA lithole ukuthi ngesikhathi uConst Mdlalose evula isango, kuvumbuke abantu ababili abangaziwa egcekeni bavulela ngentululwane yezinhlamvu bebhekise kuyena.
Uphuthunyiswe esibhedlela washonela khona. Kuthiwa emuva kokuba abasolwa beqede ukumdubula, bashaye bachitha ngemoto ebihamba inkosikazi yakhe. UMnu Ngcobo uzophinde avele kule nkantolo mhla ziyisi-9 kuNhlaba ( w) nonyaka.
Kusobala ukuthi umthetho kawunendaba nezinhlungu esizizwayo.