Kunzima esagugeni esiwelwa yindlu
Sesiphilela ingcanga yaso
USEPHILELA inja yakhe owesifazane osekhulile wasoPhande, oBonjeni, eJozini, ophila ngaphansi kwesimo esingesihle - kubalwa nokungabi nendlu enesithunzi.
UNkz Senzeni Deliwe Nzuza (76) uthi usephilela ingcanga yakhe esiphenduke umngani wakhe futhi okuyiyona ethusa izitha ezingase zimhlasele.
ILANGA lithole lolu daba ngomunye wabaholi bomphakathi onxuse ukuba kugodlwe igama lakhe ngoba udaba lwalesi saguga kudala elubika kubaholi bakahulumeni asebeke baphatha uwadi 2 - lapho uNkz Nzuza ehlala khona.
Le ntombi endala ithi ithwele kanzima empilweni njengoba uma kuyihlobo idindwa yizimvula kanti uma kukhanya unyezi, kuze kuse ibala izinkanyezi ngenxa yesimo sendlu ehlala kuyona.
ILANGA lizibonele ixhokovana okuhlala kulona uNkz Nzuza nenja yakhe - athi useyithathisa okwengane yakhe njengoba behlala bobabili.
“Ngidonsa kanzima, kanginabani ozongisiza. Ngazalelwa komalume kwesakwaGumbi, eMvokweni oPhongolo, ngafika lapha ngizofuna engizalwa nabo ngubaba. Ngeshwa-ke kwaba wukuthi sebashona bonke. Ngihlala kulolu donga olungawa noma yinini, ngiphila nale ngcanga okuyiyona esiphenduke umngani wami.
“Ngicela noma ngubani ongangisiza ngithole indlu yokulala. Ipasi senginalo kodwa ngisadonsa kanzima. Ngeswela ngisho izinkuni zokubasa, amanzi ngiwathola ngoba sengize ngasizwa wukuthi ngiphumele emgwaqweni ngiyocela izingane zabantu ngizikhokhele imali,” kusho uNkz Nzuza.
ILANGA lixhumane noMnu Sbonelo Mathenjwa, ongusomabhizinisi odume ngokwakhela abantu izindlu, othembise ukuthi uzongenelela, ayokwakhela lesi saguga indlu yokulala.
“Ngiyezwa futhi ngizomakhela indlu yokulala ukuze ezohlonipheka njengabanye abantu abadala,” kusho yena.
UMnu Mathenjwa usanda kunqoba ukhetho lokuchibiyela kuwadi 2 obelungoLwesithathu olwedlule emele i-IFP.
Isikhala sivuleke ngokushona kukaMnu Wonderboy Dlamini we-ANC, ogwazwe evakashe nomndeni wakhe olwandle eRichards Bay mhla lulunye kuMasingana (January) nonyaka.