KUSHAYISANA IZINKULUMO ZABE-ANC NGOKHETHO EJOZINI
ZIYASHAYISANA izinkulumo zabaholi be-African National Congress (ANC) ephucwe iwadi ebeyiphethe ngesikhathi kunokhetho lokuchibiyela kuMasipala waseJozini, ngoLwesithathu olwedlule.
INkatha Freedom Party (IFP) ihlwithe uwadi 2 oBonjeni, okuvuleke isikhala kuwona emuva kokubulawa kukaMnu Wonderboy Khumalo we-ANC, kade eyozijabulisa nomndeni wakhe olwandle lwaseRichards Bay mhla lulunye kuMasingana ( January) nonyaka.
Kulolu khetho i-IFP ithole amavoti ayi-1451, i-ANC (851), iNational Freedom Party (NFP) (101), i-Economic Freedom Fighters (41) kwathi obengenele ngokuzimela wathola ali-15.
ILANGA lixhumane noMnu Zeblon Tembe, ongusotswebhu weANC kuMasipala waseJozini, oveze ukuthi yena nabanye balwemukele kahle ukhetho nemiphumela yalo.
“Imiphumela yangoLwesithathu ibe mihle kwabe-IFP kodwa thina siyakhala ngoba sehluliwe. Nokhoke sehlulwe sizamile futhi lolu bekuwukhetho olunokuthula, sishaywe emini kwa-bha. Sesikulungele ukuba ngaphansi kwesandla se-IFP uma sisemkhandlwini,” kusho uMnu Tembe.
Nokho uMnu Nkosingiphile Mlambo, ongunobhala we-ANC esifundeni saleli qembu, iFar North Region (eMkhanyakude), ukhulume okwehlukile.
Uthe nakuba kuwudaba abangeke baluyise enkantolo kodwa ukhetho belungakhululekile. Ukhale ngokuthi kunabantu abasuswe kwamanye amawadi beyovotela i-IFP.
“Kufanele ikhuzwe le nto yokuthi kusuke abanye abantu kwamanye amawadi bezothathela abanye abantu izinqumo ngezindawo zabo,” kusho uMnu Mlambo.
Uthe lo mphumela ngeke ushintshe lutho kuMasipala wesiFunda uMkhanyakude ongunina weJozini, kuzoqhubeka nje kukhonye i-ANC. Ngaphandle kwalolu khetho lwaseJozini, kukhona olunye oluzoba kuwadi 4 eMtubatuba - nawo ongaphansi koMkhanyakude - mhla zingama-23 kuNhlaba (May).
Lapha kuvuleke isikhala emuva kokusula kukaMnu Wiseman Myeni (32) emuva kokusolwa ngokuthi udale ingozi ekhothile.
UMnu Mlambo uthe: “Noma bengaphinde bawine abeNkatha eMtubatuba ngeke bawuthole uMkhanyakude ngoba akukho lapho kuthiwa kufanele unyakaziswe uma usubunjiwe.”
EJozini i-IFP ibifolose ngoMnu Sbonelo Mathenjwa, okusho ukuthi sekunguyena ikhansela.
Lokhu kusho ukuthi isinezihlalo ezili-19 kulo masipala, esisodwa seDemocratic Alliance (DA), esisodwa se-Economic Freedom Fighters (EFF) bobabili abancike eNkatheni - okwenza izihlalo zabo zibe ngama-21.
I-ANC isele nezili-19 kuhlanganisa nesisodwa sekhansela elizimele, uMnu Sphamandla “Kiyogo” Mathenjwa okubukeka ezophelelwa yisikhundla sakhe sokuba yisekela lemeya - ubephakanyiswe yi-ANC.
UNobhala we-IFP, uMnu Velenkosini Hlabisa - obuye abe yiMeya kaMasipala iBigFive Hlabisa - naye uthe noma iNkatha inganqoba eMtubatuba, kakukho okuzoshintsha embusweni weANC eMkhanyakude kodwa kunezingxoxo eziqhubekayo mayelana nephutha elenzeke ngowezi-2016 eMtubatuba.
Uthe kusenokwenzeka bushintshe ubuso bobuholi eMkhanyakude.
“Namanje ithanda ukudida nje le nto yokuthi komasipala abane iqembu eliphethe owodwa selingaqhoqhobala owesifunda. Kunephutha elenzekile okumanje siphezu kwalo. Uma kuya ngokuthi liyalungiseka, kuyobe kusho ukuthi kuphelile nge-ANC kulo masipala (uMkhanyakude).
“Thina siphethe uMtubatuba, iJozini neBigFive Hlabisa, yona iphethe KwaMhlabuyalingana wodwa,” kusho uMnu Hlabisa.