Lwelapha okuningi ucansi
OVAMILE ukuthola ithuba lokwenza ucansi (ikakhulukazi kwabathandanayo noma abaganene) uhlomula kangcono ngempilo enhle ukudlula ongalutholi njalo.
Ungoti wezokubelethisa eColumbia University, e-United States of America (USA) ongumbhali webhuku elithi: “Pleasure: A Woman’s Guide to Getting the Sex You Want, Need, and Deserve” uDkt Hilda Hutsherson, uthi:
“Ukwenza ucansi njalo kungakwenza uzizwe usondele kakhulu ebudlelwaneni nesithandwa sakho - empeleni kungakwenza uphile kahle emzimbeni”. Lapha sizobheka kafushane ubuhle bokwenza ucansi kubantu besifazane nakubantu besilisa.
UBUHLE BOCANSI: ABESIFAZANE 1. KWEHLISA INGCINDEZI
Uma amaphaphu ephezulu, isibonelo;- uma kunenhlolokhono ozokuba nayo ngakusasa kumbe uma uzokwethula inkulumo emphakathini, ukwenza ucansi kungakusiza ekwehliseni umoya nesimo sokwethuka.
Ucwaningo olwenziwe yi-University of West of Scotland luveza ukuthi abantu abenza ucansi okungenani kanye noma kabili ngesonto babhekana kangcono nezimo ezinengcindezi njengokwethula inkulumo phambi kwabantu abaningi.
Bathi lokhu kungenxa yokuthi uhlobo lwezithako ( hormones) ezikhishwa wumzimba njenge-endorphin ne-oxytocin - ngesikhathi wenza ucansi -zithinta izingxenye ebuchosheni ezidala umuzwa wokukhululeka ( relaxation), wukusondelana nesithandwa ( intimacy) nokuphebeza ukuzizwa unengcindezi nokwesaba.
Baqhubeka bathi ukusizakala kuba kukhulu ikakhulukazi uma ufinyelele ngempumelelo kuvuthondaba lokwenziwa kocansi.
2. UKULALA KAHLE
Le endorphin ekusiza ukuqedeni ingcindezi, yiyona futhi ekwenza uphumule kahle emzimbeni nasengqondweni, ikwenze uzumeke zwi.
Ngaphezu kwalokho, ongoti bathi okunye okukhishwa wumzimba ngokufinyelela kuvuthondaba yiprolactin, nayo enomthelela wokwenza ulale kahle.
3. LUNCIPHISA IZINHLUNGU
Uma siyibheka ngakolunye uhlangothi eyalabo okuthi uma kunesicelo sokwenza ucansi bona babeke izaba bathi “baphethwe yikhanda” sekutholakele futhi ukuthi izithako ( hormones) ezikhiqizwa wumzimba zingasiza ekunciphiseni ubuhlungu bekhanda obuyisicefe.
Ucwaningo olwenziwe emtholampilo wekhanda elibuhlungu, iHeadache Clinic oseSouthern Illinois University, luveza ukuthi ingxenye yabesifazane abaphathwa yikhanda eliwumbelebele ( migraine), bazizwa bebangcono emuva kokufinyelela ovuthondabeni. Kuthiwa i-endorphin ephuma ngaleso sikhathi ithi mayifane nemorphine ngokuqeda izinhlungu.
3. UBUKEKA UCHACHAMBILE UMUSHA
Okhuthalele inkonzo yasekameleni uyachachamba abukeke emusha. Ukwenza njalo ucansi kukhuthaza ukukhiqizwa kwezindlala, phakathi kwazo okubalwa i-estrogen esizayo ekwenzeni uhlale ubukeka umusha futhi uwumqemane.
I-estrogen ikhuthaza ukuba nesikhumba esithambile nezinwele ezicwebezelayo, kusho uDkt Cindy Meston wasesibhedlela iRoyal Edinburgh, eScotland.
4. LUNCIPHISA IZINHLUNGU ZOKUBA SESIKHATHINI
Uma owesifazane efika kuvuthondaba, isibeletho siyafinyela, ngaleyo ndlela sisuse izithako ezikhiqizwa wumzimba ezibangela amaja- qamba esiswini, kusho uDkt Meston.
Ukufinyela kaningi kwesibeletho kuyasiza ekusheshiseni ukuphuma kwegazi ukuze izinsuku zokuba sesikhathini zisheshe ukudlula.
Ochwepheshe bokwelapha isifo senhliziyo ukwenza ucansi bakufanisa nokuzivocavoca okuthi makufane nokwenzeka uma uhamba ebhandeni ngesivinini esiphansi, ngokusho kwephephabhuku lesayensi i-The American Journal of Cardiology.
UBUHLE BOCANSI: AMADODA 1. LUNCIPHISA INKINGA YOMDLAVUZA WENDLALAKUZALA (PROSTATE CANCER)
Ukwenza ucansi njalo kuvikela owesilisa engcupheni yokuhlaselwa wumdlavuza wamadoda uma usukhulile ngeminyaka.
Ucwaningo lweNational Cancer Institute luveza ukuthi owesilisa ochitha izikhathi ezingama-21 ngenyanga yehla ngesilinganiso esingama-33% ingozi yokungenwa yilesi sifo kunalabo abachitha izikhathi ezine kuya kweziyisi-7 ngenyanga.
2. LUMENZA ABE QATHA
Njengakowesifazane, ucansi lumenza owesilisa azizwe enamandla njengomuntu ovocavoca umzimba. Ngaphezu kokuqinisa isisu, umhlane neqolo, ukwenza ucansi okuthatha imizuzu engama-30 kushisa cishe ama-200 calories - okuwenzayo umahluko.
3. UPHILA KAHLE
Ucwaningo luveza ukuthi ukwenza ucansi njalo lumenza owesilisa abukeke emusha. Bathi lokhu kakusikhona ukukhohliswa ngamehlo kepha kulehlisa ngempela ijubane lokuguga. Ukuvelwa yimibimbi kakusheshi ukwenzeka kochitha njalo.
4. LWENZA INHLIZIYO IBE NAMANDLA
Ngokocwaningo olwenziwe eQueens University eBelfast, eNorthern Ireland, abesilisa abenza ucansi kathathu noma ngaphezulu kwalokho ngesonto, bayinciphisa ngengxenye ingcuphe yokuhlaselwa yisifo senhliziyo nesohlangothi.
5. LUMENZA AHLALE ETHOKOZILE
Ukwenza ucansi njalo kwenza owesilisa ahlale ethokozile. Ngaphezu kokumphumuza engcindezini yasemsebenzini, kusiza futhi ekumenzeni abe nokuzethemba ( self-esteem), kuqede ukhwantalala ngenxa yayo belu indlala i- endorphin.