NKULUNKULU WATHATHE WONKE LA MADODA ANGONDLI
BAZALWANE abahle eNkosini, uyabona umfutho okhonjiswa yilaba befundisi abeseka uMnu Jacob Zuma njengoba ebekwe amacala, ukube bawukhombisa ezintweni ezibalulekile njengokukhulekela amadoda angondli, bengingajabula kabi.
Kangisho ukuthi ukweseka uMshosholozi kakubalulekile, mina nje sengiyamdabukela bakithi, usezogijima izinkantolo iminyaka isihambe kangaka!
Befundisi, ake nje nithandaze umthandazo oyiqiniso, nicele uNkulunkulu athathe wonke la madoda angazondli izingane zawo. Niwushaye nje lo mthandazo ningahlonizi nithi:
“Baba wethu osezulwini, thatha lonke lolu vucu olungondli, manje kuze kube phakade, amen.”
Le nkinga yamadoda angondli ivamile lapha endlini emnyama, ufice umuntu ezimpintshe ngamabhulukwe abiza o-R6 000 lilinye kodwa ingane yakhe igqoka isikhindi seKaizer Chiefs esinembobo eyasithengelwa nguninakhulu wakoninalume ngo-R50 kwaGovender laphaya ngaseVictoria Market, eThekwini.
Amanye amadoda - kakuwona nje amadoda lezi zinto ezingondli - kawazondli izingane zawo nje, kubo kwezintombi zawo ezintsha kuchathwa ngamaKellogs Corn Flakes njalo ekuseni, obhekeni babuzwa khona.
Umuntu avele akhethe inja njenge- role model yakhe. Uma ufuye injakazi, mhla izinja zikhwelana, ubona bonke oSpoti, oTiger noBathini - inja ka-anti Mamseni, umama kaNhlakanipho le ngakithi KwaDlangezwa - besemizini wakho kodwa wena kawukaze ungene emakubo ngoba ezinye zalezi zingcanga zisho ukukuqeda uma uya emakubo.
Ake imithe injakazi yakho, zinyamalala sengathi ngamazolo ebona ilanga. Sengathi ungaze uye kubanikazi bazo uyocela inhlawulo noma ilobolo. Ivele ingixake-ke mina into yomuntu wesilisa ocabanga ukuthi ingane yakhe yi- federalist, ichwane lenyoka, izozibonela ukuthi iphila ngani.
Hawu, uze wondliswe ingane yakho ngenkantolo, unamagangadanger! Kayikho into engiyizondisa okomuntu wesilisa ongayondli ingane yakhe. Ngiqinisile futhi ngeke ngixolise nokuxolisa, kumele sithandazele ukuba abantu besilisa abasebenzayo kodwa bengazondli izingane zabo, bagule isikhashana baye kwagoqanyawo.
Kuze kuthi noma esefakaza la makholwa aqamba amanga emlindelweni, asho athi:
“Hhawu bazalwane, uNkulunkulu akamnikanga thuba, ugule isikhashana nje wadlula emhlabeni.” Kulungile-ke asengaziqhubekela-ke akhohlise abangazi, athi:
“Hheyi ubezithandisa okwemali yethenda izingane zakhe, uzibona nje uzishiyele inkahlankahla yefa lemali elilingana nentshebe kababa uMkhwanazi lo okhonza eKuphakameni…”
Kakusho mina njalo maNazaretha, kusuke kusho abantu emlindelweni. Ngoba thina bantu abamnyama amanga nje yinto eziputshukelayo njengomshipho uma isisu sigcwele umoya, siwaqamba sengathi siyabukisa uma kufiwe.
Ubone nje ukuthi lo mzalwane akasazenzi ngokuqamba amanga sewadlula ngoba sewawaqamba emilindelweni ewu-90 isikhathi somdlalo we-soccer.
Siyakuthanda ukuncoma umuntu ngoba esefile ngoba nakhu sifuna ukuthandwa. Kunabantu nje ababemgxeka uNkk Winnie Madikizela-Mandela ngesikhathi esaphila, abanye baze basho nokusho ukuthi ufanelwe wukuboshwa izandla nezinyawo ngemikhuba yakhe.
Namhlanje ngoba nakhu enga- sekho, sebeyamthandaza, sithunyelelwa izitatimende ngapha nangapha abantu bezenza izinto ezidabukayo. Masibancome nje abantu besaphila - hhayi indaba yama- posthumous ncoming la - ikakhulukazi abantu besifazane abakhulise izingane ngabodwa.
Kangisayiphathi-ke eyezalukazi ezifana noNorah noMashabane ogogo bami abangenze indoda engiyiyona namhlanje. Uma-ke ngempela laba befundisi bansondo abebegcwele eNkantolo eNkulu yaseThekwini ngoLwesihlanu beyokweseka uMshosholozi wabantwana bezazi izinkinga esibhekene nazo ezweni ngenxa yamadoda angondli, ake nje bayeke ukusibonisa ukuthi ukukholwa kwabo kufana nommese wezinkwa lo oyisaha ngenxanye, bayeke futhi ukusikhohlisa ukuthi kubi ukuthandazela ukuthi abantu bafe ngoba uSamson wakwenza efuna ukubulala amaFilisti ngesikhathi enziwe impatha nguDelayila, bamemeze bathi: #AmadodaAngondliMustFall.
Nala madoda-ke azalisa sengathi azalisela ibhusha kodwa ebe engasebenzi, awame kancane, sesiyazi ukuthi ayakwazi ukuzalisa. Ukube nje amadoda a- responsible, ngabe kwale mali okuthiwa ngeyeqolo yenza ezinye izinto ezibalulekile ezweni.
Nalo hulumeni wukuthi ngowezigebengu nje, kufanele ngabe amadoda asebenzayo kodwa angondli uyawabopha, - umuntu ahlale nje ejele iminyaka eyisi-8 ngoba vele akanamsebenzi walutho - manje uyabona ukuthi uzoncishelwa ngamavoti. Amen. Hikhensile ngopfu ma-Afrika!
Hheyi ubezithandisa okwemali yethenda izingane zakhe, uzibona nje uzishiyele inkahlankahla yefa lemali...