LIZOGWEMA UKUKHUTSHWA YITSHE ELILODWA KABILI ELE-PSL
ITHOLE isifundo esinzima iHighlands Park ebuyele ishishiliza kwi-Absa Premiership ngemuva kokubhaxabula i-University of Pretoria ngo-5-1 koweNational First Division (NFD) ngoMgqibelo ntambama eMakhulong Stadium, eTembisa.
Le kilabhu eholwa nguLarry Brookstone noSinky “Twalaza” Mnisi, isizitholele ithikithi lokuyodlala esigabeni esikhulu ngesizini ezayo.
UMnisi utshele ILANGA izolo ngeSonto emini ukuthi bafunde lukhulu emaphutheni abawenzile aholele ekutheni bagencwe yizembe ngesizini edlule.
Bahlale le sizini kuphela kwiNFD njengoba sebekhuza ibuya kwiPremiership.
Uthi ukushintsha abaqeqeshi ngesikhathi bekwiPremiership kube nomthelela ekugqozeni kwemiphumela emihle, bagcina bedliwe yizembe.
Uthi yingakho bezibophezele ekutheni bazoqhubeka nethimba labaqeqeshi eliholwa ngu-Owen Da Gama no-Allan Freese oyiphini.
UMnisi uthe: “Sifunde lukhulu sidliwa yizembe. Kangifisi ukuba siphinde sibuyele kwiNFD. Kunzima lapha. Okunye okusibulele sikwiPremiership wukusayinisa abadlali abaningi, abangangenanga khaxa esitayeleni sekilabhu.
"Kuyimanje siphezu kokulungisa izinto eziningi okubalwa nokusayinisa abadlali abazongena khaxa esitayeleni sekilabhu.
“Sesiqalile ukwenza amalungiselelo esizini ezayo. Sifuna ukuzinza kwiPremiership hhayi ukulwela ukubalekela izembe. Ngeke siqhuzulwe yitshe elilodwa kani- ngi.”
Lesi sikhulu sibuye sayikhahlela ngazo zombili imibiko ethi uPentjie Zulu uxoshelwe ukudla amankwebevu. Uthi lo mdlali ugijime imidlalo emibili nje kuphela yingakho benqume ukuhlukana naye kwazise nenkontileka ibisiphela. Uthi bazimisele ngokuqhubeka nokunqoba imidlalo esele ngoba bafuna ukuqopha umlando ngokunqoba iNFD ngamaphuzu amaningi emlandweni.
Isiyonke imiphumela yemidlalo yeNFD ihambe kanje: Mthatha Bucks 2, Richards Bay 2; CPT All Stars 0, Spurs 1; Jomo 3, Tshakhuma 1; Highlands 5, Tuks 1; Leopards 1, uThongathi 0; Stellenbosch 1, Royal Eagles 1; Super Eagles 0, uBuntu 3; Real Kings 0, Mbombela Utd 0.
EyeMultiChoice Diski Shield: Chiefs Reserves 2, Platinum Stars Reserves 0; PMB United Reserves 1, AmaZulu Reserves 3; Sundowns Reserves 3, Polokwane City Reserves 1; Ajax Reserves 1, Celtic Reserves 3; Pirates Reserves 0, Wits Reserves 1; Chippa Reserves 0, Arrows Reserves 0; Free State Stars Reserves 2, Cape Town City Reserves 1; SuperSport Reserves 0, Baroka Reserves 0.
Imiphumela yemidlalo yeSafa KZN ABC Motsepe League: UMvoti FC 2, Friends 1; Ladysmith 0, Milford FC 1; Summerfield 3, Ashley 0; KwaMashu 1, Wanderers 0; Durban FC 1, Phenduka 2; Natal 0, Pmb City 1; Ses’khona 1, Juventus 2.
Imidlalo yeMotsepe League engoLwesithathu ihlelwe kanje:
EMakhehleni Grounds: KwaMashu All Stars vs KwaDukuza United 15h00.
EMzisho: Natal United vs uMvoti FC 15h00.