UBONA INGOZI UMQEQESHI WE-PIRATES
UBONA ingozi kwizimbangi uMilutin “Micho” Sredojevic ( osesithombeni) ongumqeqeshi we-Orlando Pirates engakaliphonsi ithawula ngesicoco seAbsa Premiership.
IBucs izobhekana neSuperSport United kowe-Absa Premiership ngoLwesithathu ngo-19h30 eMbombela Stadium, eNelspruit.
IBucs iya kulo mdlalo nje, ihambela phezulu njengoba imiphumela iyivuma.
Emidlalweni yayo eyisihlanu eyedlule isayinqobe yonke. Ibhekene neSuperSport edo- nsa kanzima njengoba iphikwa yimiphumela.
USredojevic, oqokwe njengomqeqeshi oqavile wenyanga kaNdasa (March), uthi iSuperSport izokuba yingozi.
“Kunzima ukudlala nekilabhu edonsa kanzima ngoba abadlali bakho bavele bayeye bese bezithola besengozini. Kuzofanele sikhohlwe yifomu yeSuperSport sidlalele ukufa nokuphila kulo mdlalo. Eyesicoco seligi angifuni ukukhuluma ngayo kakhulu, angifuni ukufakela abadlali bami ingcindezi engenasidingo. Asidlale nje thina sinqobe imidlalo sizobona ukuthi siphele- laphi,” kusho uSredojevic.
UKaitano Tembo obambe izintambo zokuqeqesha kwiSuperSport, uthi sinzima isimo ababhekene naso.
“Indawo esihleli kuyona kwilog ayiyinhle neze, yenza isimo sethu sibe nzima. Lo mdlalo wePirates kuzofanele sizame ngawo wonke amandla ukuwunqoba ngoba asiphephile kwathina ezembeni,” kusho uTembo.
Komunye umdlalo we-Absa Premiership, i-Ajax Cape Town izobhekana neBidvest Wits ngoLwesithathu ngo-19h30 e-Athlone Stadium, eCape Town.