UVALO NGENDAWO KWI-TOP 4 KWI-MARITZBURG UNITED
UNOVALO nge-top 4 ayifunayo umnikazi weMaritzburg United emuva kokuba ezakhe ziphunyukwe yinyamazane seziyibambile.
ITeam of Choice iphunyukwe yiqatha emlonyeni ibambana neCape Town City ngo-1-1 kowe-Absa Premiership ngoMgqibelo ebusuku eHarry Gwala Stadium, eMgungundlovu.
IMaritzburg yiyona ebone imbobo yepali kuqala u-Andrea Fileccia ebhakuzisa inethi, kodwa igoli lacinywa ngelikaMasoud Juma umdlalo ususesikhathini somusa kanompempe.
UFarook “Ntshebe” Kadodia ongumnikazi weMaritzburg, uthi ungenwa ngamanzi emadolweni nge-top 4 ayigaqele.
“Ngendlela izinto eziyiyona ikhona inkinga ekhona, nasemdlalweni weBidvest Wits sihlulwe ngenxa yobudedengu bethu.
"Nakulo mdlalo senze into efanayo saphisana ngegoli elilula umdlalo usuphelile. Ingicasulile into eyenzeke kulo mdlalo angifuni ukuqamba amanga.
“Ukuphunyukwa wumdlalo ngalolu hlobo yisimo esingamukelekile.
"Besiwadinga la maphuzu ngoba imidlalo esisalele inzima. Ngendlela okuyiyona manje nginovalo nge-top 4 engiyifunayo,” kusho uKadodia.
UBenni McCarthy ocija iCity, uthi ezakhe bekufanele ziwunqobe lo mdlalo.
“Umdlalo ubuphethwe yithina kodwa sangakusebenzisa lokho. Ngijabule ngephuzu yize belingasifanele, besingenza kangcono kabi ukuba abadlali bami kabawamoshi amathuba esiwatholayo,” kusho uMcCarthy.