Udalula izingqinamba zokudlalisa kwiPSL
Uyazigqaja ngokudlalisa iGhana neNigeria
UDALULA izingqinamba abhekana nazo u-Akhona Makalima ongunompempe wesifazane odlalisa imidlalo yePremier Soccer League (PSL) neyeConfederation of African Football Association (Caf).
U-Akhona ubecobelela ngolwazi lwalo mkhakha onompempe abadlalisa esigabeni seSAB League abebenzelwe umcimbi wokubavalelisa ngoLwesihlanu emini eTshwane.
Uthi uma ungunompempe wesifazane kumqoka ukuzethemba nokubekezela ngoba iyashisa insimbi.
“Ngokwendalo abantu besilisa kabathandi ukutshelwa ngumuntu wesifazane. Nakimina kuba nzima ngoba ngidlalisa amadoda. Kwesinye isikhathi kawafuni ukulandela imiyalelo yami.
“Lokhu kabakwenzi ngoba kungangifanele ukudlalisa esigabeni esikhulu kodwa kudalwa wukuthi ngingumuntu wesifazane. Kwesinye isikhathi abaqeqeshi bakuchapha ngenhlamba ngenhloso yokukucasula ukuze wenze amaphutha noma uthathe izinqumo ezivuna amakilabhu abo.
“Ngijabule ngoba kulolu hlelo lweSAB League baningi onompempe besifazane kunabesilisa. Nami ngikhiqizwe yiyona imidlalo yeSAB League. Ngiyafisa baqhubekele phambili bangabheki emuva. Nami angifuni ukugqama ngedwa njengonompempe wesifazane.
“Ngiyadinga nje kube nonompempe esizoxoxa naye ngezinto zabesifazane ezindlini zokushintshela,” kusho lo nondweba odabuka e-Eastern Cape.
U-Akhona uthi akulula ukuthi onompempe besilisa bamcindezele nganoma yingaluphi uhlobo.
“Ngiyahleka kodwa angingeneki kalula. Ngiyawuhlonipha umsebenzi wami. Ngisho ngiyodlalisa kude, akekho noyedwa unompempe wesilisa oke aso- ndele kimina. Ngenhlanhla ngisebenza nabantu abahloniphayo futhi abawazisayo umsebenzi wami. Nokho-ke sike sibone onompempe beshada futhi baphile kahle. Okumqoka wukungahlanganisi izinto zangasese nomsebenzi,” kusho u-Akhona obedlala ibhola ngaphambi kokungena emkhakheni wokudlalisa.
Uthi yize iminingi imidlalo asebe yingxenye yayo kodwa kukhona angasoze ayikhohlwa.
“Umdlalo wami wokuqala kwiAbsa Premiership ubuphakathi kwe-University of Pretoria neMpumalanga Black Aces. Angisoze ngawukhohlwa. Ngidlalise iFree State Stars nePlatinum Stars kanti omunye ogqamile kimina ubuphakathi kweMamelodi Sundowns nePlatinum.
“Ngiphinde ngehlelwa yinhlanhla yokudlalisa iGhana neNigeria,” kusho u-Akhona obhekise amabombo e-Uganda lapho eyodlalisa khona.