NGIYANIMEMA KUKHUKHULELANGOQO WOMHLANGANO
NGESONTO esiya kulona lomhla zili-15 kwephezulu zonke izindlela zizobheka eKing Zwelithini Stadium, eMlazi, lapho AmaZulu FC ezokube enomdlalo obucayi ne-Orlando Pirates kwi-Absa Premiership. Uzoqala ngo-15h00. Lo mdlalo ungomkhulukazi njengoba kuzokube kubhekene amakilabhu anomlando ocebile kunobhutshuzwayo waseNingizimu Afrika. Womabili la makilabhu aseyibambe iminyaka engaphezulu kwengama-80 kunobhutshuzwayo wakuleli.
Yingakho sinqume ukubiza ukhukhulelangoqo womhlangano ngaphambi kwalo mdlalo ukuhlahla indlela ebheke phambili sindawonye, abaphathi nabalandeli. Ngizokwethulela abalandeli umhlahlandlela wekilabhu. Udwetshwe ngabaqondisi bekilabhu nabaphathi, bese ngilalela imibono yabalandeli. Silindele abalandeli abaningi lapha njengoba uhlobo lwalo mhlangano kungeyona into yansuku zonke.
Sizoxoxa ngezithinta izisebenzi zekilabhu, abadlali nalabo esifuna ukuqinisa ngabo isikwati njengoba sesibheke kwisizini ezayo yezi-2018/2019. Sizobhunga nangezinguquko kwesibambisene nabo nangabaxhasi bekilabhu, yizimpahla zekilabhu zokugqoka, amakhadi obulungu abalandeli nezinhlelo zokuvuselelwa kwamaziko.
Sifuna ukubona ikilabhu ikhula, ibuyelwe yisithunzi sokuba ngenye yalandelwa kakhulu kuleli nase-Afrika jikelele. Sifuna ukuba namaziko aphilayo, azoqhamuka nezinhlelo zokuvukuza abalandeli emazingeni aphansi.
Sizobhunga ngezinhlelo ezithitha umgubho wosuku lokuzalwa lweMbube neloMntwana wakwaPhindangene, iNkosi uMangosuthu Buthelezi, ohlanganisa iminyaka engama-90 edla amabele. Ikilabhu ifisa ukwenza okuthile futhi nabalandeli babe yingxenye yalokhu.
Ngibagqugquzela kakhulu abalandeli ukuhambela lo mhlangano ozoqala ngo-9 ekuseni. Ngicela bafike nemibono ezoyisa ikilabhu ezingeni eliphezulu. Sifuna ukuqinisekisa ukuthi isizini ezayo iba ngengcono kakhulu kunalena, nayo esiphathe kahle. Lokhu-ke ngeke kwenzeke ngaphandle kweqhaza elimqoka labalandeli bethu abahlala bewa bevuka nathi.
Cishe wonke umthandi kanobhutshuzwayo uyakuqaphela ukuthi izinga lokuncintisana kwiPremier Soccer League (PSL) selisezingeni lomhlaba. Kayikho ikilabhu engasashayeki. Sibonile ngoMgqibelo ebusuku ukuthi iPlatinum Stars ikhombise ingcwenga, ngeke uzenzele kuyona (yize ibambe ibhuleki).
Emidlalweni eyisihlanu yokugcina kuzokube kushipha ukotshi kodwa ngifuna ukukucacisa ukuthi silwela ukuqeda kwi-top 8 kumnyama kubomvu. Nokho uma sehluleka ngeke kusho ukuphela komhlaba ngoba obekumqoka kakhulu wukugcina indawo yethu kwiPSL. Sicela ukuba abalandeli bangquzuke kuzona zonke izinkalo ukuzoseseka ukufeza leli phupho. Nginilindele nonke ngeSonto eKing Zwelithini Stadium kukhukhulelangoqo womhlangano ngaphambi kokuqala komdlalo wezinkani zababili. Kuyinto ebuhlungu ukuthi elakuleli lizilele uMama Winnie Madikizela-Mandela kulezi zinsuku. Ezinsukwini ezimbalwa ezedlule bengifunda ngeqhaza lakhe ekukhululekeni kwelakuleli ebugqilini bobandlululo. Kuyathobekisa ukwazi ngobunzima izigagayi zepolitiki ezidlule kubona ukuze elakuleli likhululeke. SingamaZulu FC sikhulekela umndeni wakhe ukuba uqine kulesi sikhathi esinzima. Sengathi umphefumulo wakhe ungalala ngoxolo.