Izinsolo zokuhudula izinyawo kwiChiefs
UKomphela akayizwa eyokwesula esikhundleni
ZIYA ngokuqina izinsolo zokuthi uSteve “Mphathi” Komphela ocija iKaizer Chiefs usejikelwe nangabadlali bakhe futhi yibona abamudayisa ngamabomu ngenhloso yokuba ingelulwa inkontileka yakhe.
IChiefs iguqiswe yiChippa United ngo-3-0 kowe-Absa Premiership ngoMgqibelo ntambama eFNB Stadium, eSoweto.
Amagoli okunqobe ngawo iChippa abekwe enethini nguThabo Rakhale, uMxolisi Machuphu no-Edward Manqele.
ILANGA lihletshelwe ngomunye umdlali weChiefs ukuthi isizathu esikhulu sokubheda kwabo wukuthi kabasamuzwisisi kahle uKomphela.
Lo mdlali ulibeke ngesihloko elokuthi sebekhathele nguyena, usehlale ephinda izinto ezizodwa kuyabonakala ukuthi unengcindezi.
Uthi kunabadlali abadala kule kilabhu abahudula ngamabomu izinyawo, asebemjikele ngenxa yokuthi usebuye angabadlalisi.
“La ekilabhini kuphethe (egagula abadlali abathathu). Uma wenza okubi komunye wabo azikuhambeli kahle izinto.
"Njengoba ebuye engabadlalisi nje (egagula ababili) usuke esezifake enkingeni. Awuzibuze nje wena ukuthi kungani kuvele kwalimala wonke umuntu esithubeni, kangisho ukuthi ngithini,” kusho lo mdlali ocele ukuba lingadalulwa igama lakhe.
UKomphela ekhuluma nabezindaba emuva kwalo mdlalo, uvumile ukuthi abadlali bakhe abazange bazinikele ngokuphelele kulo mdlalo.
“Ukulahla amaphuzu ngale ndlela akumnandi neze, kubuhlungu kuwona wonke umuntu. Nokho kufanele ngikusho ukuthi asizange sizinikele ngokuphelele kulo mdlalo. Sidlale ibhola eliphansi kakhulu.
"Kodwa-ke kufanele sivuke sizithintithe ithemba lisekhona angikalilahli,” kusho uKomphela.
Lo mqeqeshi ugcizelele ukuthi ngeke aliphonse ithawula kule kilabhu azophelelwa yinkontileka kuyona ngoNhlangulana (June).
“Ngeke ngishiye. Kangiyena umuntu obalekela umsebenzi wakhe. Nxa uyindoda eziqhenyayo, ukuzinikela nengcindezi kuhlala kuyingxenye yomsebenzi wakho,” kusho uKomphela emuva kokuphuma ngesamagundwane ehlaselwa yisigejane sabalandeli abebecikwa wukuthelwa yiChippa ngehlazo ekhaya.
Uthi unethemba lokuthi lesi sigameko sizokwenza ezakhe zizikhandle ngokuphindiwe kwi-semifinal yeNedbank Cup.