KUNGENELELA UKAIZER MOTAUNG ODAKENI LWE-CHIEFS
USIHLALO weKaizer Chiefs, uKaizer Motaung, ( osesithombeni) ubize umhlangano ophuthumayo ngenhloso yokuthola izimpendulo njengoba ikilabhu yakhe iqhubeka nokuba yinhlekisa.
IChiefs ithole izifundo zamahhala zikanobhutshuzwayo ithelwa ngehlazo yiChippa United kuba ngu-3-0 kowe-Absa Premiership ngoMgqibelo ntambama eFNB Stadium, eSoweto.
Amagoli okunqobe ngawo iChippa abekwe enethini nguThabo Rakhale, uMxolisi Machuphu no-Edward Manqele.
Kulo mdlalo kusuke uthuthuva abalandeli bejikijela enkundleni becikwa yilo mphumela. Bebelibeka ngesihloko elokuthi abasamfuni umqeqeshi, uSteve “Mphathi” Komphela. Uphume eqashwe ngamaphoyisa kwazise abalandeli bebezama ukumshaya. Bajikijele uKomphela nabadlali beChiefs baphinda baqhinqa befuna uBobby Motaung oyiMenenja-jikelele yeChiefs.
ILANGA lihletshelwe ngumthombo walo osondelene kakhulu nomndeni wakwaMotaung, ongabanikazi bale kilabhu, ukuthi uMotaung ubize umhlangano ophuthumayo namuhla ngoMsombuluko.
Lo mtho- mbo, onxuse ukuba ligodlwe igama lawo, uthe: “UMotaung udinwe uyaqhuma ngokwenzeke kulo mdlalo kangangoba ubize umhlangano ophuthumayo kusasa (namuhla ngoMsombuluko) ngoba ufuna izimpendulo kuKomphela.
"Okuhle wukuthi ubekhona enkundleni okuyinto abengasavamisile ukuyenza. Uzibonele amaphutha enziwe ngumqeqeshi efaka uBhongolwethu Jayiya waphinde wamukhipha.
“UMotaung ulidlalile ibhola, ubekhaliphe ngendlela eyisimanga, uzibonele kulo mdlalo ukuthi nguKomphela obedidekile, bahlulwe ngamaphutha akhe. Into emcika kakhulu uMotaung wukuthi uKomphela ulokhu eqhubeka nokubeka amarekhodi amabi futhi amqhatha nabaxhasi.
“I-Orlando Pirates imatasa iheha abaxhasi kodwa iChiefs kuthule ngenxa yokungenzi kahle kwayo. Sizozwa kahle emuva kwalo mhlangano ukuthi kwenzakaleni.”
Imizamo yokuthola uMotaung ukuba aphawule ngalolu daba iphunzile njengoba ucingo lwakhe beluvaliwe.
OlukaBobby belukhala kodwa engalubambi. Kuthintwa uVina Maphosa wezokuxhumana kwiChiefs, ucele ukungaphawuli ngalolu daba.