Ziyasuka ngomdlalo Imbewu
ABALINGISI asebemnkantshubomvu kwezemidlalo ewuchungechunge, uMpumelelo Bhulose equkule uLeleti Khumalo ochungechungeni lokukhangisa umdlalo omusha abazobonakala kuwona, iMbewu. UBhulose uke wabonakala kuZalo nakwiGreed and Desire kanti uLeleti uke wadlala kwiGenerations nakuZalo.
BAMUKELWE ngokukhonjiswa izindawo zokuvakasha KwaZuluNatal abalingisi bomdlalo owuchungechunge Imbewu: The Seed, ozoqala ukukhonjiswa esiteshini sikamabonakude esizimele i-eTV ngesonto elizayo.
Uhlaka olumele ezokuvasha kulesi sifundazwe, iTourism KZN, ngokubambisana neDurban Tourism, bemukele abalingisi balo mdlalo ngesitayela njengoba bebakhiphele ezindaweni ezahlukene zokuheha izivakashi ngoMgqibelo nangeSonto.
NgoMgqibelo laba balingisi bathole ithuba lokuyobona indawo lapho owaba nguMengameli wokuqala wentando yeningi uMnu Nelson Mandela aboshelwa khona eHowick ebizwa ngeMandela Capture Site.
Obhekele ezokuxhumana kwiTourism KZN, uNksz Nhlanhla Ngwenya, utshele laba balingisi ukuthi inhloso yokubakhiphela kule ndawo wukuthi kulo nyaka kubungazwa iminyaka eyikhulu kaMnu Mandela ngakho babone kungcono ukuba bamukele lo mdlalo nabalingisi ngokubaletha kuyona.
Abalingisi badlulele endaweni yobumnandi ekhona eMgungundlovu ebizwa ngokuthi Intulo Lounge lapho bezitike khona ngezidlo nangeziphuzo. Babukeke bethokozile abalingisi ukuhambela lezi zindawo njengoba abanye babo bebeqala ukuzibona. Izolo abalingisi bazitike ngenyama nangeziphuzo Eyadini Lounge eMlazi njengoba le ndawo ingenye ehanjelwa kakhulu yizivakashi eziqhamuka ezindaweni ezahlukene.
Lo mdlalo kulindeleke ukuba uqale ukukhonjiswa mhla ziyi-16 kwephezulu kanti ubukeka uzoba nedumela njengoba ubophele abalingisi okubalwa kubo uMpumelelo Bhulose noLeleti Khumalo kanti udidiyelwe yinkakha uDuma KaNdlovu osezakhele igama kulo mkhakha.