Masinqandwe isihlava sokufuna izinto ngobudlova
KUNENKOLELO kwabanye bongoti kwezokuphatha ohulumeni basekhaya ukuthi uMasipala weTheku usengozini yokuba senkingeni yokweswela imali yokuqhuba izidingo zomphakathi uma uqhubeka nokusaphaza imali yabakhokhi bentela ngendlela engahlelekile njengoba ubukeka wenza.
Lezi zinsolo zibukeka zizoqina emuva kwesinqumo okuthiwa senziwe yimeya yaleli dolobha, uNkk Zandile Gumede, sokuqasha abathi bangamalungu ophiko lwezempi lwe-African National Congress (ANC), uMkhonto weSizwe Military Veterans Association (MKMVA) ngempelasonto, bengakaze bafake izicelo zomsebenzi ngokusemthethweni.
Lesi sinqumo sibukeka singekho emthethweni, okungasho ukuthi uma elinye lamaqembu emkhandlwini noma inhlangano yabakhokhi bentela ingaya enkantolo iyocela ukuba inqume ngaso, kungenzeka inkantolo ithole ukuthi kasikho emthethweni. Lokhu kwenzeka emuva kokuba abantu abali-100 abathi bangamalungu eMKMVA, bengene ngoshova emahhovisi kamasipala ngoLwesibili lwesonto eledlule, bafuna ukunikwa imisebenzi ngenkani.
Ubudlova bala madoda buwasebenzele njengoba uNkk Gumede kuthiwa usenqume ukuba aqashwe wumasipala, ngaphandle kokubheka ukuthi zikhona yini izikhala zemisebenzi, wukubheka ukuthi imali yokuholela laba bantu ikhona yini kwibhajethi yomkhandlu nokuthi kwenziwe inhlolokhono ukubheka ukuthi banalo yini ikhono lokwenza umsebenzi.
Uma sibeka udaba lwala madoda eqembu elibusayo eceleni, sekuyinhlalayenza eThekwini ukuba izinhlangano ezithile okuthiwa zisondelene noNkk Gumede noMnu Jacob Zuma obengumengameli waseNingizimu Afrika, zihlomule kulo masipala.
Amalungu alezi zinhlangano afuna ukuqashwa ngenkani noma anikwe amathenda yilo masipala ngaphandle kokufaka izicelo zincintisane nabo bonke abantu njengoba kulawula imithetho yezwe. Okwenzeka eThekwini kunika isithombe sokuthi ukuze uhlomule ngomsebenzi namathenda kulo masipala, kufanele ube yilungu leqembu elibusayo futhi ufune izinto ngesidlova, ungalandeli imigomo nemithetho ebekiwe ukulandelwa yibo bonke abantu abangasondelene neqembu eliphethe izintambo.
Lesi sihlava sokufuna izinto ngodlame, sesisabelele nakwezinye izingxenye zeKwaZulu-Natal njengoba kwenzekile ngesonto eledlule abantu baseMooi River bevala umgwaqo uN3 olibhekise eGoli, bashisa amaloli ngoba bethi bafuna ukuqashwa yizinkampani zamaloli ngenkani.
Lo mkhuba kufanele ukhuzwe, izinswelaboya ziboshwe, zijeze ukuze nabanye bafunde isifundo, bapheze ukwephula umthetho. Uma abenzi bobubi beyekwa bazenzela umathanda, kwene nokhula, leli lizwe lisengozini yokuba lingabuseki.
Uma sibuyela kokwenzeka eThekwini, sethemba ukuthi uNgqongqoshe wezokuBusa ngokuBambisana nezoMdabu, UDkt Zwelini Mkhize, uyabona ukuthi kuqhubekani kuleli dolobha, nokuthi uzokhuza ngokushesha ukuze kubuye isimo sokuphatha ngendlela ehlelekile nokongiwa kwemali yabakhokhi ntela.