Ziyadinga ukubongwa izisebenzi ezinkampanini
MHLELI: Njengomuntu osebenza ngamabhizinisi, ngiwushayela ihlombe umdlalo owuchungechunge odlala kuMzansi Magic (161), iThe Queen - ngehora lama-21h00 kusuka ngoMsombuluko kuya kuLwesihlanu.
Kangiyena umuntu obuka kakhulu le midlalo ewuchungechunge, kodwa kungihlabe umxhwele engizithele kukhona kulezi zinsuku.
Kukhona le nsizwa okuthiwa nguTebogo Mlotshwa (Fezile Makhanya) ephakamise ukuthi kuzomele izisebenzi zayo zenzelwe nje okuncane kokuzijabulisa ngamagalelo azo ebhizinisini lakwaKhoza, lokhu abakwaKhoza abebengakuzwa kahle.
Babeke izaba zokuthi bona bayaziholela izisebenzi ngakho-ke kabasiboni isidingo sokuzenzela idili. Umfo kaMlotshwa lo, uphikelele waze wazijuba wakhipha ephaketheni lakhe.
Kwesinye isikhathi izisebenzi ziyadinga ukubongwa nje, ukuze zihlale zinawe noma sekufika izivunguvungu ebhizinisini, kungabi nje wukuthi nihlanganiswe wumsebenzi. Uma ngizwa kuthiwa uMlotshwa uyafika kuleli bhizinisi, okucacayo ukuthi nje indaba yokubonga izisebenzi kayingenwa lapha kwaKhoza.
Kuyadinga osomabhizinisi bazinuke amakhwapha ukuthi ngale kokuholela kahle izisebenzi, kodwa zike zibongwe nje ngeqhaza lazo? Khumbula phela ukuthi izisebenzi zifana nenjini yebhizinisi, uma kuthiwa kuteleke imishini yokusebenza, kulula ukuyilahla uthenge emisha kodwa uma kuteleke izisebenzi usuke usenkingeni.
Kakudingeki ukuthi uze uzenzele idili uma ingavumi inkece kodwa nje ungazinika iholidi ziyophumula nemindeni yazo noma uzikhuthaze ziyozithuthukisa amakhono ezinawo azosiza wena belu ekugcineni.
Ezinye izinkampani zize zikhiphe umklomelo wenyanga wesisebenzi esivelele, lokho kuyazikhuthaza izisebenzi.
Uthe efika umfo kaMlotshwa wakubalula ukuthi ufuna ukuhlangana nezisebenzi ake ezwe izikhalo zazo, nangempela kwahlaluka ukuthi ikhona inkinga njengoba umshayeli weloli ehamba amabanga amade engenaye umsizi.
Ngokwemboni yezokuthutha, kuhlale kubalulwa ukuthi abashayeli bamaloli bamabanga amade kumele baphumule ngokwanele noma babe nabasizi abazoshayela, kodwa koKhoza kalukho lolo hlelo.
Ngisishayela ihlombe lesi siqephu engithuke ngisibuka kanti kuzoqondana nomsebenzi engiwenzayo wokuthuthukisa nokucijisa osomabhizinisi.