KUBHIMBA UHLELO KWI-MANCHESTER CITY
KUBHIMBA izinto kwiManchester City ephuthwe yithuba lokugcotshwa njengezingqwele ezintsha ngesitayela ihlulwa ngomkhaya iManchester United ngo-3-2 koweEnglish Premiership ngoMgqibelo ebusuku ekomkhulu layo, i-Etihad Stadium.
ICity ingene kulo mdlalo idinga amaphuzu amathathu ukuze ibe yizingqwele ezintsha zePremiership. Injabulo ibibuzwa kubalandeli beCity ngesikhathi sekhefu njengoba kuyiwe kulona ihamba phambili ngo-2-0.
Kuzokuthi kusasa ngoLwesibili yamukele iLiverpool enkundleni efanayo kowomlenze wesibili weUefa Champions League. ICity yiyona ezokuya kulo mdlalo inengcindezi njengoba ngeledlule kowomlenze wokuqala ihlulwe ngo-3-0 ekuhambeni.
Okunyusa amathuba okuphuma kulo mqhudelwano kweCity, wukuthi ihluleke ngisho ukuthola igoli elilodwa ekuhambeni.
Nokho-ke abalandeli bayo babukeka bezokwesula izinyembezi ngokunqoba iPremiership njengoba bedinga amaphuzu amathathu kuphela kule midlalo esele ukuba babe ngomakhonya kule sizini.
I-AS Roma yase-Italy izokwamukela iBarcelona yaseSpain kowomlenze wesibili kusasa. IBarca inqobe ngo-4-1 kowomlenze wokuqala ngeledlule. IReal Madrid yaseSpain izosingatha iJuventus yase- Italy ngoLwesithathu kowomlenze wesibili. IMadrid inqobe ngo-3-0 kowomlenze wokuqala, kanti abukeka emfimfa amathuba eJuventus njengoba ihlulelwe ekhaya.
IBayern Munich yaseGermany izokhiphana inkani neSevilla yaseSpain ngosuku olufanayo. ISevilla ihlulwe ngo-2-1 kowomlenze wokuqala isekhaya.
Isiyonke imidlalo ye-Uefa Champions League phakathi nesonto ihlelwe kanje:KUSASA NGOLWESIBILI Manchester City vs Liverpool 20h45. Roma vs Barcelona 20h45. NGOLWESITHATHU Bayern Munich vs Sevilla 20h45. Real Madrid vs Juventus 20h45.