Injabulo eBuhleni "bevunwa" yijaji
Kugxekwe ijaji Jappie
APHUME eNkantolo eNkulu yaseMgungundlovu kuqhilika izihlathi amaNazaretha ohlangothi lwaseBuhleni, oluholwa yiNkosi uMduduzi "Nyazilwezulu‚" Shembe, emuva kokuba iJaji Isaac Madondo likhombise ukugxeka isinqumo sikaMengameli wamaJaji KwaZulu-Natal, uJustice Achmat Jappie, asikhiphe ngonyaka wezi-2016 mayelana nombango wesihlalo sokuhola leli bandla (eBuhleni).
Isinqumo seJaji Jappie sivune uhlangothi lwaseThembezinhle obeluholwa yiNkosi Vela "Misebeyelanga‚" Shembe engasekho - sichitha olwaseBuhleni.
Lolu daba lusenkantolo nje yingoba abaseBuhleni baphonsele inselelo isinqumo seJaji Jappie, balidlulisa icala.
Zithe zibekwa nje, iJaji Madondo lalanda umlando wokusungulwa kwebandla lamaNazaretha nguMphrofethi Isaiah Shembe ngonyaka we-1910, maqede lalanda nokulandelana kwabaholi baleli bandla kuze kufike oNyazinilwezulu.
Libe selingena esinqumweni seJaji Jappie lathi bekumele ngabe libunakile bonke ubufakazi obethulwe phambi kwalo lize linake nalobo obuyiziphrofetho.
Libe selithi iJaji Jappie libushaye indiva ubufakazi obubalulekile beNkosi uMqoqi Ngcobo nobeNkosi uBoy Qwabe, lithi bekungamele ukuba (iJaji Jappie) lehlulele ngelingakubiza ngokubhimba kokwethulwa koNyazi ngosuku lomfihlo (kayise, iNkosi Vimbeni "Thingolwenkosazane" Shembe), kepha bekumele lingene lithi shi ebudlelwaneni obebuphakathi kweNkosi Ngcobo neNkosi noThingolwenkosazane.
Libeke la maphuzu:
Sasingekho isidingo sokuba uThingo lujube iNkosi Ngcobo ukuba imemezele lokho (ukubekwa koNyazi) uma selukhotheme ngoba lwabe selukudlulisile kuyona njengoba babesondelene kakhulu - lokho kuyavumeleka nasesintwini.
UMmeli uZwelabantu Buthelezi wayesiza uThingo kwezomthetho kodwa wayengelona ilungu lebandla futhi akasilona iNazaretha uma kuqhathaniswa neNkosi Ngcobo.
Incwadi ekhomba iMisebeyelanga nayo ishiye imibuzo emini- ngi ngokusho kommeli woNyazi, u-Advocate Rajesh Chaudree, ngoba owayihambisa kuMnu Buthelezi, okunguMnu Chancy Sibisi, wethula ubufakazi bokuthi akalubonanga uThingo luyisayina. Ngisho nowalufakazela (ukuthi uThingo lusayinile) onguMnu Zwane, akalubonanga (lusayina) kanti naye (uSibisi) wavele wathatha incwadi wayisayina engayifundanga, wayiyisa kuMnu Buthelezi okuyinto engezwakali.
Ochwepheshe abathathu abahlola ukubhalwa kwezincwadi okuthiwa bavumelana ngokuthi kwabe kuyisandla soThingo esasayina, kwaba ngoyedwa kuphela owathi wumkokotelo lowo msayino, lapho kwakumele kube yinkantolo ethatha isinqumo ingeneliswa ngokushiwo yilaba abathathu futhi nabo abangasho ukuthi lo msayino uyiwona.
Indawo yaseBuhleni yanikelelwa iNkosi u-Amos Kula "Nyangayezulu" Shembe yiNKosi yamaQadi yangaleso sikhathi, iNkosi uMzonjani Ngcobo ukuba kube wumuzi wayo nendawo yokukhonzela - ineziqu ezimbili iyodwa, ngeke kwathiwa yindawo yesonto.
IJaji Madondo liphelelwe yisikhathi lisethula isinqumo salo lingakasiphethi, lanquma ukuba kuqhutshekwe naso kusasa ngoLwesihlanu.
Lesi sinqumo seJaji Madondo sizolandelwa yizinqumo zamajaji amabili ebelibambisene nawo. AbaseThembezinhle baphume enkantolo benikina amakhanda, bengagculisekile, kuzwakala abanye bebeka ithemba labo kula amabili.